پاکستان دا مشرقِ وسطیٰ اتے خلیج فارس اچ امن و استحکام کیتے کوششاں دا عزم

اسلام آباد۔26 مارچ(اے پی پی) پاکستان مشرقِ وسطیٰ اتے خلیج فارس اچ امن و استحکام کیتے اپݨا تکڑا عزم دوہریندے آکھیے جو ساݙا سفارتی مقصد ثالثی اتے مکالمے دے ذریعے امن حاصل کرݨ اے تے اے موقف بالکل واضح اے۔ ترجمان دفتر خارجہ طاہر حسین اندرابی ہفتہ وار پریس بریفنگ اچ آکھیا جو وزیراعظم شہباز شریف پہلے ہی کشیدگی گھٹ کرݨ کیتے مذاکرات اچ سہولت یا میزبانی دی پیشکش کر چکین۔ انہاں اپیل کیتی جو غیر مصدقہ خبراں اتے قیاس آرائیاں نہ کیتاں ونڄن، مذاکرات دے ویلھے اتے ڄاہ دی تفصیلات ویلھا آوݨ تے شیئر کر ݙتیاں ویسن۔ ترجمان ݙسایا جو وزیراعظم شہباز شریف آپ سفارتی رابطیاں دی اڳواݨی کریندے پئن اتے انہاں سعودی ولی عہد محمد بن سلمان، ایرانی صدر ڈاکٹر مسعود پزشکیان، ترک صدر رجب طیب ایردوان اتے ٻئے کئی مسلم رہنماواں نال فون تے ڳالھ کیتی اے۔ انہاں رابطیاں اچ خلیج فارس دی سنگین صورتحال تے ڳالھ تھئی اتے کشیدگی گھٹ کرݨ تے زور ݙتا ڳیا۔ ترجمان ݙسایا جو نائب وزیراعظم اسحاق ڈار وی سفارتی سرگرمیاں اچ مصروف ہین اتے او 18 مارچ کوں ریاض اچ علاقائی وزرائے خارجہ دے اجلاس اچ شریک تھئن۔ ہک سوال دے ولدے اچ انہاں آکھیا جو سعودی عرب ایں جھیڑے دا وݙا فریق اے اتے پاکستان دی کوششاں سعودی عرب دے نال قریبی مشورے نال جاری ہین۔ چھیکڑ تے ترجمان بھارت توں مطالبہ کیتا جو او کشمیری خواتین رہنماواں آسیہ اندرابی، فہمیدہ صوفی اتے ناہیدہ نسرین کوں فوراً رہا کرے۔ انہاں بھارتی عدالت ولوں سݨایاں ڳیاں سزاواں دی سخت مذمت کیتی اتے ایکوں سیاسی انتقامی کارروائی قرار ݙتا۔(ج، م/ 20:00)