حاجی کیمپاں اچ عازمینِ حج دے سارے کم ہکے ڈینہہ مکمل تھیسن

اسلام آباد۔ 27 مارچ(اے پی پی) وزیراعظم محمد شہباز شریف دی ہدایت تے وزارتِ مذہبی امور عازمینِ حج دے خرچے ڳھٹ کرݨ سانگے ہک وݙا فیصلہ کیتے۔ ہُݨ ملک دے 10 حاجی کیمپاں اچ حج دی تربیت، ویکسینیشن اتے سامان دی فراہمی سودھا سارے کم ہکے ݙینہہ مکمل کیتے ویسن۔ اے سہولت 8 اپریل توں اسلام آباد، لاہور، کراچی، پشاور، کوئٹہ، فیصل آباد، ملتان، سیالکوٹ، سکھر اتے رحیم یار خان دے حاجی کیمپاں اچ شروع تھیسی۔ ایں فیصلے نال تقریباً 1 لکھ 19 ہزار عازمین کوں فائدہ تھیسی۔ ترجمان مذہبی امور عمر بٹ دے مطابق ویکسینیشن لازمی اے جیندے بارے معلومات “پاک حج ایپ” تے مل ویسن۔ عازمین کوں ہوائی ٹکٹ، ویزا، شناختی لاکٹ اتے دوائیاں دی پیکنگ دی سہولت وی ݙتی ویسی۔ عازمین کوں ہدایت کیتی گئی اے جو او اپݨا اصل شناختی کارڈ اتے بینک دی رسید نال ڳھن آون۔