پٹرولیم مصنوعات دیاں قیمتاں اچ ودھارے دی تجویز مسترد، وزیر اعظم دا قیمتاں نا ودھاوݨ دا اعلان

وزیراعظم پٹرولیم مصنوعات دیاں قیمتاں اچ ودھارے دی تجویز مسترد کریندے قیمتاں ٻیاں نا ودھاوݨ دا اعلان کیتے اتے آکھیے جو اوکھے حالات دے باوجود اپݨی قوم دا مفاد ݙاݙھا پیارا اے، امید اے جو اساں اڄوکے بحران دے طوفان توں وقار دے نال سرخرو تھی تے نکلسوں۔ قوم نال اپݨے خطاب اچ وزیر اعظم شہباز شریف آکھیے جو حکومت پٹرول صرف 322 اتے ڈیزل 335 روپے فی لیٹر تے ݙیندی پئی اے، ڈیزل تے 203 اتے پٹرول تے 97 روپے ودھارا کرݨ دی تجویز ݙتی ڳئی ہئی ٻھل حکومت عوام دے اوکھ کوں ݙیہدے ہوئے قیمتاں اچ ودھارا نا کرݨ دا فیصلہ کیتے۔ انہاں آکھیے جو پٹرولیم مصنوعات دیاں قیمتاں دی مد اچ 3 ہفتے اچ 125 ارب روپے داتاریخی ٻھار تہاݙی حکومت اپݨے مونݙھے تے چاتے، اے رقم کئی ٻئے منصوبیاں تے استعمال تھی سڳدی ہئی ٻھل عوام دے ٻیا ٻوڄھ پاوݨ اتے اوکھ نسے ݙیوݨ چاہندے تہوں اے فیصلہ کیتے۔ وزیر اعظم آکھیے جو خطے اچ جنگ دے حالات پاروں ڄڳ اچ پٹرولیم مصنوعات دیاں قیمتاں ݙوڑیاں تھی ڳن اتے پمپاں تے عوام دیاں لائناں ہین، عوام اوکھے اتے حکومتاں بے بس ہین ٻھل تہاݙی حکومت  محدود وسائل دے باجود موثر اقدامات نال مہنگائی دے طوفان کوں ݙکیے، اڄ او ویلھا اے جو اساں اپݨے ڄیوݨ اچ انقلابی تبدیلیاں ڳھن آئوں اتے غیر ضرری سفر توں گریز کروں اتے، کفایت شعاری کوں اپݨی ذمہ داری سمڄھوں۔ وزیر اعظم آکھیے جو ایں مشکل ویلھا دا مقابلہ کرݨ کیتے جامع منصوبہ ٻݨیدے پئے ہیں جیندے کیتے عوام ساݙی حمایت کرے اتے ایں منصوبہ بندی دا اعلان تیکھے کیتا ویسی۔ چھیکڑ تے انہاں امید بھرا ہک شعر وی پڑھیے۔