ہر بندے اتے برادری کوں ماحول بچاوݨ کیتے اپݨا کردار ادا کرݨا چاہیدے، وزیراعظم دا “ارتھ آور” تے سنیہا

اسلام آباد۔ 28 مارچ(اے پی پی)وزیراعظم محمد شہباز شریف زمین دے تحفظ کوں ہک سانجھی اتے وݙی ذمہ داری قرار ݙیندے آکھیے جو ہر بندے اتے ہر برادری کوں ماحول کوں بچاوݨ کیتے اپݨا حصہ پاوݨا ہوسی۔ چھݨ چھݨ کوں منائے ونڄݨ آلے “ارتھ آور” دے حوالے نال اپݨے سنیہے اچ وزیراعظم قوم توں اپیل کیتی اے جو او چھݨ چھݨ کوں “ارتھ آور” دے موقع تے رات 8:30 توں 9:30 وڄے تئیں ہک گھنٹے کیتے بجلی اتے غیر ضروری بتیاں بند رکھن یا ڳھٹ توں ڳھٹ استعمال کرن۔ وزیراعظم آفس دے میڈیا ونگ ولوں جاری بیان دے مطابق وزیراعظم آکھیا جو ماحول دے چیلنجز نال بھرے ایں دور اچ “ارتھ آور” اساکوں یاد ݙویندے جو زمین دا تحفظ اساں ساریاں دی سانجھی ذمہ داری اے، ایں سال اے ݙینہہ “زمین کیتے ہک گھنٹہ وقف کرو” دے عنوان نال منیندا پئے جیندا مقصد ماحول دا بچائو، بجلی دا صحیح استعمال اتے موسم دی تبدیلیاں بارے آگاہی ݙیوݨ اے۔ وزیراعظم آکھیے جو اے سنیہا صرف لائٹاں بند کرݨ دا نئیں ٻھل ہر بندے کوں ماحول دی ذمہ داری دا احساس کرݨا پوسی، ساݙے اڄ دے فیصلے ہی آوݨ آلیآں نسلاں دے مستقبل دا فیصلہ کریسن۔ وزیراعظم آکھیا ڄیکر عالمی سطح تے زہریلی گیساں دے اخراج اچ پاکستان دا حصہ ہک فیصد توں وی گھٹ اے، پر اساں موسمی تبدیلیاں توں سب توں ودھ متاثر تھیوݨ والے ملکاں اچ شامل ہیں۔ وݙے سیلاب، موسم دی سختی اتے قحط ساݙی روز دے ڄیوݨ، کھاوݨ پیوݨ اتے پاݨی دے ذخیریاں کیتے خطرہ ہن۔ حکومت انہاں چیلنجز نال نمٹݨ کیتے “اپ اسکیلنگ گرین پاکستان پروگرام”، “لیونگ انڈس انیشی ایٹو” اتے “ریچارج پاکستان” جھیں منصوبیاں تے کم کریندی پئی اے۔ ایندے علاوہ سیلاب توں متاثرہ علاقیاں اچ جدید وارننگ سسٹم وی لائے ویندے پئن۔ وزیراعظم لوکاں کوں سنیہا ݙتا جو ” آؤ اساں سب رل تے ایں عالمی مہم اچ حصہ ڳھنوں اتے این سنیہے کوں اپݨا پکا معمول بݨا ڳھنوں تاں جو آوݨ والیاں نسلاں کیتے ہک ہرا بھرا اتے محفوظ پاکستان بݨ سگے۔