اسلام آباد۔29 مارچ(اے پی پی) پاکستان، سعودی عرب، ترکیے اتے مصر خطے اچ جنگ مکاوݨ اتے امن دی بحالی کوں ترجیح قرار ݙیندے مذاکرات اتے صبر و تحمل اپناوݨ اتے کشیدگی ڳھٹاوݨ کیتے رل تے چلݨ تے اتفاق کیتے۔ اے اتفاق اسلام آباد اچ پاکستان دی اڳواݨی اچ چار ملکی وزرا خارجہ مشاورتی اجلاس اچ تھئے جیندے اچ پاکستان دے نائب وزیر اعظم و وزیر خارجہ سینیٹر اسحاق ڈار، سعودی …
چار ملکی وزرا خارجہ مشاورتی اجلاس؛ خطے اچ جنگ مکاوݨ اتے امن دی بحالی ترجیح، مذاکرات اتے صبر و تحمل ہی معاملات سلجھاوݨ دی کنجی، کشیدگی ڳھٹاوݨ کیتے رل تے چلݨ تے اتفاق
مزید خبراں
اسلام آباد۔29 مارچ(اے پی پی) پاکستان، سعودی عرب، ترکیے اتے مصر خطے اچ جنگ مکاوݨ اتے امن دی بحالی کوں ترجیح قرار ݙیندے مذاکرات اتے صبر و تحمل اپناوݨ اتے کشیدگی ڳھٹاوݨ کیتے رل تے چلݨ تے اتفاق کیتے۔ اے اتفاق اسلام آباد اچ پاکستان دی اڳواݨی اچ چار ملکی وزرا خارجہ مشاورتی اجلاس اچ تھئے جیندے اچ پاکستان دے نائب وزیر اعظم و وزیر خارجہ سینیٹر اسحاق ڈار، سعودی عرب دے وزیر خارجہ شہزادہ فیصل بن فرحان آل سعود، ترکیہ دے وزیرِ خارجہ ہاقان فیدان اتے مصر دے وزیرِ خارجہ ڈاکٹر بدر بن عبدالعاطی باہمی صلاح اچ شامل ہن۔ اجلاس اچ امریکا ایران جنگ اتے ایندے نال مشرق وسطیٰ سودھے پورے خطے اچ ودھدی کشیدگی دے ماحول، معاشی و اقتصادی بحران دی صورتحال اتے منݙی اچرات توں بچݨ کیتے ممکنہ اقدامات اتے باہمی تعاون دے امکانات تے غور کیتا ڳئے۔ اجلاس اچ اتفاق تھئے جو اڄوکی صورتحال اچ جنگ دا خاتمہ خطے دے بہترین مفاد اچ اے، ایں سانڳے صبر و تحمل ہی اڳوں ودھݨ دا ہکو رستہ اے، خطے اچ پائیدار امن و استحکام کیتے مشترکہ کوششاں جاری رکھیاں ویسن ڄݙاں جو امریکا اتے ایران کوں مذاکرات دی میز تے کٹھے ٻلھاوݨ اتے نتیجہ خیز اقدامات کیتے سفارتی اقدامات تیز کیتے ویسن۔ شرکا اتفاق کیتے جو خطے اچ پائیدار امن کیتے قریبی رابطے جاری رکھے ویسن۔ اجلاس فلسطینی عوام کیتے پاکستان دی غیر متزلزل حمایت دا وی اعادہ کیتا اتے غزہ اچ اسرائیلی جارحیت دی مذمت کیتی۔ ایں توں پہلے اسلام آباد اچ میڈیا نال الیندے نائب وزیر اعظم و وزیر خارجہ اسحاق ڈار آکھیے جو پاکستان دے دورے تے آنے والے وزرائے خارجہ نال ملاقاتاں مفید رہین، جیندے اچ خطے دی مجموعی صورتحال، امن و استحکام اتے باہمی تعاون ودھاوݨ تے ڳالھ تھئی، موجودہ علاقائی صورتحال تے پاکستان، سعودی عرب، ترکیہ اتے مصر دے مشاورتی اجلاس اچ وی تفصیلی اتے نتیجہ خیز ڳالھ مہاڑ تھئی اے، خطے اچ جاری تنازعات دے تیکھے اتے مستقل خاتمے تے ذور ݙتا ڳئے۔ نائب وزیرِاعظم آکھیا جو چار ملکی مشاورتی عمل دا ݙوڄھا اجلاس اسلام آباد اچ تھئے جیندے اچ پاکستان، سعودی عرب، ترکیہ اتے مصر شرکت کیتی، ایندا پہلا اجلاس 19 مارچ کوں تھیا ہا۔ اجلاس موجودہ علاقائی کشیدگی، انسانی جاناں دے نقصان اتے معاشی اثرات تے ݙاݙھا چنتا کیتے، خطے اچ جاری تنازع ݙاݙھا افسوسناک اے جیندے اثرات پورے خطے اچ عوام دے ڄیوݨ اتے معیشت تے پوندے پین۔ زور ݙتا ڳئے جو انہان اوکھے حالات اچ مسلم اُمہ دا اتحاد وݙا ضروری اتے اہم اے تاں جو مشترکہ چیلنجز دا مؤثر انداز اچ مقابلہ کیتا ونڄ سڳے۔
