سعودی عرب، ترکیہ اتے مصر دے وزرائے خارجہ مشاورتی اجلاس دے بعد وطناں کوں ول ڳئن

اسلام آباد۔ 30 مارچ(اے پی پی) سعودی عرب، ترکیہ اتے مصر دے وزرائے خارجہ مشرقِ وسطیٰ اچ کشیدگی ڳھٹ کرݨ اتے خطے اچ امن دیاں کوششاں کوں اڳوں ودھاوݨ سانڳے مشاورتی اجلاس اچ شرکت دے بعد وطناں کوں ول ڳئن۔ ائیرپورٹ تے ایڈیشنل خارجہ سیکرٹری مشرقِ وسطیٰ سید احمد معروف، ایڈیشنل خارجہ سیکرٹری افغانستان و مغربی ایشیا سید علی اسد گیلانی اتے وزارتِ خارجہ دے ٻئے حکام انہاں کوں  الوداع کیتا۔ سعودی عرب دے وزیرِ خارجہ شہزادہ فیصل بن فرحان، جمہوریہ ترکیہ دے وزیرِ خارجہ ہاکان فیدان اتے عرب جمہوریہ مصر دے وزیرِ خارجہ ڈاکٹر بدر عبدالعاطی دے دورہ پاکستان دا مقصد پاکستان، سعودی عرب، ترکیہ اتے مصر وچال مشاورتی عمل دے ݙوجھے اجلاس اچ شرکت کرݨا ہئی، جیڑھا جو اسلام آباد اچ تھئے۔ ایں سانڳے پہلا اجلاس 19 مارچ 2026 کوں ریاض اچ تھیا ہئی۔ انہاں وزراء نائب وزیراعظم و وزیرِ خارجہ محمد اسحاق ڈار دی دعوت تے اسلام آباد دا دورہ کیتا۔ وزرائے خارجہ موجودہ علاقائی صورتحال اتے تفصیلی ڳالھ مہاڑ کیتی اتے خطے اچ جاری جنگ دے تیکھے اتے مستقل خاتمے دے ممکنہ طریقیاں تے وی غور کیتا۔ وزراء چنتا کیتے جو خطے اچ جاری تنازعہ پورے خطے اچ انسانی جاناں اتے روزگار تے تباہ کن اثرات پیندا پئے جیڑھا ٻہوں افسوسناک اے۔ انہاں اتفاق کیتا جو اے جنگ کہیں دے وی فائدے اچ کائنی اتے ایندا نتیجہ صرف موت اتے تباہی دی صورت اچ نکلسی، ایں سانگے انہاں اوکھے حالات اچ امتِ مسلمہ دا اتحاد ٻہوں ضروری اے۔ نائب وزیراعظم اسحاق ڈار مہمان وزراء کوں اسلام آباد اچ ممکنہ امریکہ-ایران مذاکرات دے امکانات دا ݙسایا۔ اجلاس اچ شریک وزراء صورتحال کوں قابو اچ رکھݨ، کشیدگی دے خطرات گھٹ کرݨ اتے فریقین وچال مذاکرات کیتے سازگار ماحول بݨاوݨ دا عزم دوہرایا جو مکالمہ اتے سفارتکاری ہی امن دا واحد راستہ اے اتے اقوامِ متحدہ دے منشور دے اصولاں، خاص طور تے ریاستاں دی خودمختاری دے احترام تے عملدرآمد ضروری اے۔ وزرائے خارجہ چارے برادر ملکاں وچال باہمی تعاون کوں ٻیا تگڑا بݨاوݨ دے طریقیاں تے وی الایا۔ بعد اچ مہمان وزراء وزیراعظم شہباز شریف نال وی ملاقات کیتی اتے انہاں کوں مشرقِ وسطیٰ دی صورتحال تے اپݨے اپݨے ملکاں دا موقف ݙسیا۔ انہاں پاکستان دے مثبت کردار تے وزیراعظم، نائب وزیراعظم اتے فیلڈ مارشل سید عاصم منیر دی قیادت کوں خراجِ تحسین پیش کیتے۔