خیبرپختونخوا وچ ݙومختلف جھڑپاں دے دوران بھارتی حمایت یافتہ “فتنہ الخوارج” نال تعلق رکھݨ آلے 13 خارجی ہلاک

راولپنڈی۔ 1 اپریل (اے پی پی) سکیورٹی فورسز صوبہ خیبر پختونخوا وچ ݙو مختلف جھڑپاں دے دوران بھارتی حمایت یافتہ “فتنہ الخوارج” نال تعلق رکھݨ آلے 13 خارجیاں کوں ہلاک کر ݙتے۔ آئی ایس پی آر توں جاری بیان موجب 30 مارچ کوں خارجیاں دی موجودگی دی اطلاع تے سکیورٹی فورسز ضلع خیبر دے علاقے باڑا وچ ہک انٹیلیجنس بیسڈ آپریشن کیتا۔ آپریشن دے دوران سکیورٹی فورسز خارجیاں دے ٹھکاݨے کوں موثر انداز وچ نشانہ بݨایا تے شدید فائرنگ دے تبادلے دے بعد ݙاہ خارجیاں کوں جہنم واصل کر ݙتا ڳیا۔ ہک ٻیا انٹیلیجنس بیسڈ آپریشن ضلع بنوں وچ کیتا ڳیا، جتھاں فائرنگ دے تبادلے دے دوران ترائے خارجیاں کوں موثر طریقے نال ہلاک کر ݙتا ڳیا۔علاقے وچ موجود کہیں وی ٻئے بھارتی حمایت یافتہ خارجی دے خاتمے کیتے کلیئرنس آپریشنز جاری اے۔وفاقی ایپکس کمیٹی دے منظور شدہ نیشنل ایکشن پلان “عزمِ استحکام” دے وژن دے تحت پاکستان دی سکیورٹی فورسز تے قانون نافذ کرݨ آلے اداریں ولوں جاری انسدادِ دہشت گردی مہم پوری رفتار نال جاری رہسی تاں جو ملک توں ٻاہرلی سرپرستی وچ تھیوݨ آلے دہشت گردی دے ناسور دا مکمل خاتمہ کیتا ونڄ سڳے