سردار ایاز صادق دا خیبر پختونخوا وچ 13 دہشت گرداں کوں جہنم واصل کرݨ تے سکیورٹی فورسز کوں خراجِ تحسین

اسلام آباد۔ 1 اپریل (اے پی پی) سپیکر قومی اسمبلی سردار ایاز صادق خیبر پختونخوا دے ضلع باجوڑ تے بنوں وچ سکیورٹی فورسز دی کامیاب کارروائیاں دے دوران 13 دہشت گردواں کوں جہنم واصل کرݨ تے خراجِ تحسین پیش کیتے۔ اپݨے ہک بیان وچ انہاں آکھیا سکیورٹی فورسز وقتی تے موثر کارروائیاں کریندے دہشت گرداں دے ناپاک ارادیں کوں مٹی وچ ملا ݙتے، باجوڑ تے بنوں وچ انٹیلیجنس بیسڈ آپریشنز دے دوران 13 خارجیاں دی ہلاکت سکیورٹی اداریں دی پیشہ ورانہ صلاحیتاں دا منہ ٻولیندا ثبوت اے، دہشت گرد عناصر دے خلاف کامیاب کارروائیاں قوم دے عزم تے ریاست دی تکڑی پالیسی دا مظہر اے ، دہشت گردی مکاوݨ کیتے سکیورٹی فورسز دیاں قربانیاں کݙاہیں بھلائیاں نی ونڄ سڳدیاں۔ انہاں آکھیا قوم اپݨی بہادر افواج تے قانون نافذ کرݨ آلے اداریں دیاں قربانیاں کوں قدر دی نگاہ نال ݙیکھدی اے۔ سپیکر قومی اسمبلی دہشت گردی دے مکمل خاتمے تائیں کارروائیاں جاری رکھݨ دے عزم دا اعادہ کریندے ہوئیں آکھیا “عزمِ استحکام” دے تحت دہشت گردی دے خلاف جاری مہم پاکستان دے روشن تے محفوظ مستقبل دی ضمانت اے، دشمن دے ناپاک ارادیں کوں ہر قیمت تے ناکام بݨایا ویسی۔