پاکستان تے بین الاقوامی مالیاتی کارپوریشن دا سانجھا تعاون مزید تکڑا بݨاوݨ دے عزم دا اعادہ

اسلام آباد۔ 1 اپریل (اے پی پی) پاکستان تے بین الاقوامی مالیاتی کارپوریشن (IFC)سانجھے تعاون کوں مزید تکڑا کرݨ، ترجیحی اقدامات تے تکھے عملدرآمد یقینی بݨاوݨ تے عالمی بینک گروپ دے سارے دستیاب مالیاتی تے تکنیکی وسائل توں فیدہ چیندے پاکستان وچ اصلاحات دے ایجنڈے، نجی شعبے دی ترقی تے پائیدار معاشی ترقی دی حمایت جاری رکھݨ دے عزم دا اعادہ کیتے۔ اے ڳالھ وفاقی وزیر خزانہ و محصولات سینیٹر محمد اورنگزیب تے آئی ایف سی دے پاکستان، افغانستان تے وسط ایشیائی ملکاں دے ڈویژنل ڈائریکٹر سائمن انڈریو دے وچال ملاقات وچ آکھی ڳئی۔ ایں موقع تے پاکستان وچ عالمی بینک دی کنٹری ڈائریکٹر بولورما آمگابازرا تے آئی ایف سی دی کنٹری منیجر ناز خان وی موجود ہن۔وزیر خزانہ سائمن انڈریو دی نویں تقرری دا خیر مقدم کیتا تے پچھلے کجھ سالاں وچ پاکستان وچ آئی ایف سی دی ودھدی دلچسپی، خاص طور تے سرمایہ کاری تے تجارتی مالیات دے شعبیں وچ تعاون دی تعریف کیتی۔ آئی ایف سی دے وفد وزیر خزانہ کوں پاکستان وچ اپݨے ودھدے سرمایہ کاری پورٹ فولیو دے بارے بریفنگ ݙتی جیڑھا ہݨ سالانہ 2 ارب ڈالر توں ودھ ڳئے، ایں سال تقریباً 2.7 ارب ڈالر دی سرمایہ کاری دا عزم وی کیتا ڳئے۔ اہم شعبیں وچ چھوٹے تے درمیانے درجے دے کاروبار دی فنانسنگ، مقامی کرنسی وچ قرضے ݙیوݨ تے گرین بانڈ دا اجرا شامل اے۔ ملاقات وچ خاص طور تے بنیادی ڈھانچے تے پبلک پرائیویٹ پارٹنرشپ دے منصوبیں وچ نجی شعبے دی سرمایہ کاری ودھاوݨ تے توجہ ݙتی ڳئی۔ وزیر خزانہ نجی شعبے دی ترقی کیتے مقامی کرنسی وچ قرضیں دی سہولت کوں ٻہوں ضروری قرار ݙتا۔ اجلاس وچ روزگار دے موقع پیدا کرݨ، وینچر کیپیٹل دے نظام دی تشکیل تے حکومت و کاروباری حلقیں دے درمیان مکالمے کوں ادارہ جاتی شکل ݙیوݨ تے وی غور کیتا ڳیا۔ فریقین علاقائی معاشی رابطے، خاص طور تے وسط ایشیائی ملکاں نال تعاون تے زرعی کاروبار دے موقع توں فیدہ چاوݨ دی اہمیت تے وی ڳالھ کیتی اے۔ وزیر خزانہ وفد کوں معاشی استحکام، توانائی دی سپلائی چین دے انتظام تے ہدفی سبسڈی فریم ورک دے بارے وی ݙسایا۔