وزیراعظم شہباز شریف دی زیرِ صدارت نوجواناں کیتے نوکریاں دے موقع ودھاوݨ دے اقدامات بارے جائزہ اجلاس

اسلام آباد۔ 1 اپریل (اے پی پی) وزیراعظم محمد شہباز شریف جدید تقاضیں موجب نوجواناں کوں تکنیکی تے فنی تربیت ݙیوݨ کیتے اقدامات تکھے کرݨ دی ہدایت کریندے آکھیے حکومت تربیت یافتہ افرادی قوت تیار کرݨ کیتے کئی اقدامات کریندی پئی اے۔ وزیراعظم محمد شہباز شریف دی زیرِ صدارت نوجواناں کیتے نوکریاں دے موقع ودھاوݨ کیتے اقدامات دے حوالے نال جائزہ اجلاس تھیا جیندے وچ وفاقی وزراء ڈاکٹر مصدق مسعود ملک، احد خان چیمہ، محمد اورنگزیب، عطاء اللہ تارڑ، چوہدری سالک حسین، ڈاکٹراحسن اقبال، شزا فاطمہ خواجہ، وزیر مملکت بلال اظہر کیانی، چیئرمین پرائم منسٹر یوتھ پروگرام رانا مشہود احمد خان، چیئرمین ایچ ای سی تے متعلقہ اداریں دے اعلیٰ افسر شریک ہن۔وزیراعظم دفتر دے میڈیا ونگ توں جاری بیان موجب وزیراعظم رانا مشہود احمد خان دی سربراہی وچ پی ایم یوتھ پروگرام دی کارکردگی تے اطمینان دا اظہار کریندے آکھیا نوجوان اساݙی قوم دا مستقبل ہن، حکومت انہاں کوں پیشہ ورانہ مہارت ݙیوݨ تے انہاں کوں افرادی قوت وچ شامل کرݨ کیتے کئی اقدامات کریندی پئی اے۔ وزیراعظم ہدایت کیتی جدید تقاضیں موجب نوجواناں کوں تکنیکی تے فنی تربیت ݙیوݨ دے حوالے نال اقدامات تکھے کیتے ونڄن۔ انہاں آکھیا نیشنل ووکیشنل اینڈ ٹیکنیکل ٹریننگ کمیشن وچ اڄوکی اصلاحات دے بعد نوجواناں کوں تکنیکی تربیت ݙیوݨ وچ کافی بہتری آئی اے، نوجوان افرادی قوت دی صلاحیتاں کوں کم وچ گھن آوݨ کیتے نیوٹیک دے ذریعے شروع کیتے ڳئے جامع تربیتی پروگرام دے مثبت نتیجے آوݨ شروع تھی ڳئن۔وزیراعظم آکھیا بین الاقوامی سطح تے زیادہ مانگ آلے ہنر دے حوالے نال نوجواناں دی بین الاقوامی سرٹیفیکیشن دے نال فنی تے تکنیکی تربیت اولین ترجیح اے۔ اجلاس وچ وزیراعظم کوں ٻاہرلے ملک تے قومی سطح تے نوجواناں کیتے نوکریاں دے موقع پیدا کرݨ دے حوالے نال اقدامات دے بارے ݙسایا ڳیا۔ اجلاس دے دوران بریفنگ وچ ݙسایا ڳیا پرائم منسٹر یوتھ پروگرام تے وزارتِ خارجہ عالمی سطح تے نوجواناں کیتے نوکریاں دے کئی موقع لبھ چکی اے تے مزید موقع تلاش کرݨ تے کم جاری اے، پی ایم یوتھ ہب قومی تے بین الاقوامی سطح تے نوکریاں دے موقع دی معلومات دے حوالے نال مرکزی حیثیت اختیار کر چکئے، ٻاہرلے ملکاں وچ آئی ٹی، صحت، تعمیرات، سیاحت، لاجسٹکس تے ٻئے شعبیں وچ نوکریاں دے موقع موجود ہن۔بریفنگ موجب ہائیر ایجوکیشن کمیشن پاکستان دی 282 یونیورسٹیاں توں فارغ التحصیل طالب علماں دی ڈیجیٹل ایپ دے ذریعے روزگار دے حوالے نال ٹریکنگ کریندا پئے جیندے ذریعے فارغ التحصیل طالب علماں کوں نوکری ملݨ دا ریکارڈ رکھیا ویندا پئے، اے ریکارڈ اڳوں کیتے تعلیمی پالیسی بݨاوݨ وچ مددگار ثابت تھیسی۔ بریفنگ وچ ݙسایا ڳیا تکنیکی تربیت دے ودھارےکیتے وفاقی وزارتِ تعلیم دے زیرِ انتظام 32 تعلیمی اداریں وچ “میٹرک ٹیک” متعارف کرایا ڳئے، فنی تے تکنیکی تربیت دے حوالے نال میٹرک ٹیک دی طرز تے “انٹر ٹیک” وی وقتی متعارف کرایا ویسی۔