پاکستان تے ناروے وچال پیرس معاہدے دے آرٹیکل 6.2 دے تحت مفاہمتی یادداشت تے دستخط

اسلام آباد۔ 1 اپریل (اے پی پی) پاکستان تے ناروے پیرس معاہدے دے آرٹیکل 6.2 دے تحت پہلا تاریخی ݙو پاسہ معاہدہ کر ڳھدے جیندے بعد پاکستان کیتے بین الاقوامی کاربن تجارت، کلائمیٹ فنانس، صاف توانائی تے کلائمیٹ سمارٹ زراعت وچ سرمایہ کاری دے نویں رستے کھل ڳئن۔ اتھاں وزارتِ موسمیاتی تبدیلی دے زیرِ اہتمام تھیوݨ آلی تقریب وچ مفاہمتی یادداشت تے دستخط کیتے ڳئے۔ ایں معاہدے کوں عالمی کاربن مارکیٹ وچ پاکستان دے داخلے دی وݙی پیش رفت قرار ݙتا ویندا پئے۔ ایں موقع تے خطاب کریندے وفاقی وزیر مصدق ملک ایں معاہدے کوں تاریخی سنگِ میل قرار ݙتا تے آکھیا جو پاکستان کوں کاربن مارکیٹ دے عملی مرحلے وچ گھن آسی ۔ انہاں آکھیا جو ایں معاہدے دے تحت پاکستان صاف توانائی، زراعت، ٹرانسپورٹ تے ویسٹ مینجمنٹ دے ایجھے منصوبے شروع کر سڳسی جیندے توں کاربن کریڈٹس حاصل تھیسن تے اخراج وچ تھیوݨ آلی کمی ناروے کوں ویچی ونڄ سڳسی ۔انہاں آکھیا اے معاہدہ اوں ویلھے تھئے جݙاں پاکستان چھل تے شدید گرمی دا سامݨا کریندا پئے، ایں کیتے اے بین الاقوامی مالی وسائل گھن آوݨ وچ مددگار ثابت تھیسی ۔ ناروے دے سفیر پیر البرٹ الساس آکھیے ہک نویں دور دا آغاز اے، ناروے 2030ء تائیں ماحولیاتی طور تے غیر جانبدار بݨݨ کیتے پاکستان جیھے ملکاں توں کاربن کریڈٹس گھنݨ چاہندے ۔ ناروے ایں مقصد کیتے 1.5ارب ڈالر رکھئن