پاکستان، ترکیہ، مصر، انڈونیشیا، اردن، قطر، سعودی عرب تے متحدہ عرب امارات دے وزرائے خارجہ دا سانجھا بیان، اسرائیلی پارلیمنٹ اچ فلسطینیاں کیتے سزائے موت دے قانون دی منظوری دی مذمت

اسلام آباد۔ 2 اپریل (اے پی پی) پاکستان، ترکیہ، مصر، انڈونیشیا، اردن، قطر، سعودی عرب تے متحدہ عرب امارات دے وزرائے خارجہ اسرائیلی قابض طاقت دی طرفوں اپݨی پارلیمنٹ (کنیسٹ) اچ ایجھے قانون دی منظوری دی شدید مذمت کیتی اے جیڑھا مقبوضہ مغربی کنارے اچ سزائے موت دے نفاذ دی اجازت ݙیندے تے جیندے عملی اطلاق فلسطینیاں دے خلاف کیتا ویندا پئے ۔ دفتر خارجہ موجب وزرائے خارجہ اپݨے سانجھے بیان اچ اسرائیل دی ودھدی امتیازی تے جارحانہ پالیسیاں تے تشویش دا اظہار کیتا جیڑھی ہک نسلی امتیاز تے مبنی نظام کوں تکڑا کریندن تے ایجھے بیانیے کوں ودھارا ݙیندن جیڑھا مقبوضہ فلسطینی علاقیں اچ فلسطینی عوام دے ناقابلِ تنسیخ حقوق بلکہ انھاں دے وجود تائیں توں انکار کریندے۔وزرائے خارجہ آکھیا جو اے قانون سازی خصوصاً ایندے فلسطینی قیدیاں دے خلاف امتیازی اطلاق دے تناظر اچ ہک خطرناک شدت اختیار کرݨ دے برابر اے۔ انھاں خبردار کیتا جو ایجھے اقدامات کشیدگی کوں مزید ودھا سڳدن تے علاقائی استحکام کوں ضیان پُڄا سڳدن۔ وزرائے خارجہ اسرائیلی حراست اچ فلسطینی قیدیاں دی حالت تے تشویش دا اظہار کیتا تے قابلِ اعتماد اطلاعات دے تناظر اچ ودھدے خطرات توں خبردار کیتا جیندے اچ تشدد، غیر انسانی تے توہین آمیز سلوک، فاقہ کشی تے بنیادی حقوق توں محرومی شامل اے انھاں زور ݙتا جو اے اقدامات فلسطینی عوام دے خلاف وسیع تر خلاف ورزیاں دے ہک تسلسل دی عکاسی کریندن۔ وزرائے خارجہ فلسطینیاں دے خلاف اسرائیل دی نسلی امتیاز تے مبنی، جابرانہ تے جارحانہ پالیسیاں دی اپݨی مخالفت دا اعادہ کیتے۔ انھاں ایں ڳالھ تے زور ݙتا جو قابض طاقت ایجھے اقدامات توں پرہیز کرے جیڑھے زمینی صورتحال کوں مزید خراب کر سڳدن۔ انھاں احتساب دی اہمیت کوں اجاگر کریندے استحکام برقرار رکھݨ تے مزید وڳاڑ کوں روکݨ کیتے عالمی کوششاں کوں تکڑا بݨاوݨ دا مطالبہ کیتے۔