بدعنوانی مکاوݨ تے شفافیت دے ودھارےدیاں کوششاں عالمی ایجنڈے، پائیدار ترقیاتی اہداف نال ہم آہنگ ہن، چیئرمین سینیٹ

اسلام آباد۔ 2 اپریل (اے پی پی) چیئرمین سینیٹ سید یوسف رضا گیلانی آکھیے بدعنوانی مکاوݨ تے شفافیت دے ودھارے سانڳے کیتیاں ونڄݨ آلیاں کوششاں عالمی ایجنڈے، خصوصاً اقوامِ متحدہ دے 2030 دے پائیدار ترقیاتی اہداف نال ہم آہنگ ہن، جیڑھا جو تکڑے اداریں دے قیام، کرپشن اچ کمی تے پائیدار ترقی کیتے ناگزیر اے۔ سینیٹ سیکرٹریٹ توں جاری بیان موجب چیئرمین سینیٹ اے ڳالھ قومی احتساب بیورو (نیب) دے چیئرمین لیفٹیننٹ جنرل (ر) نذیر احمد نال پارلیمنٹ ہاؤس اسلام آباد اچ ملاقات اچ آکھی۔ سید یوسف رضا گیلانی قومی احتساب بیورو دے کلیدی کردار کوں اجاگر کریندے ہوئیں ملک اچ شفاف طرزِ حکمرانی تے قومی خوشحالی دے ودھارے اچ ایندے کردار دی تعریف کیتی۔ انھاں کرپشن دے خلاف موثر اقدامات، شفافیت دے ودھارے تے احتساب دے نظام کوں تکڑا بݨاوݨ کیتے بیورو دی مسلسل کوششاں کوں تعریف دے لائق قرار ݙتا۔سید یوسف رضا گیلانی آکھیا جو بطور وزیراعظم، سپیکر قومی اسمبلی تے ہݨ چیئرمین سینیٹ، انھاں ہمیشہ شفافیت تے احتساب دے اصولاں دی حمایت کیتی اے۔ انھاں دا آکھݨ ہئی جو اے محض انتظامی اصطلاح کائنی بلکہ بہتر طرزِ حکمرانی دے بنیادی تھمب ہن۔ انھاں نیب دی سالانہ رپورٹ 2025 کوں ہک ٻہوں اہم دستاویز قرار ݙیندے آکھیا اے رپورٹ ادارے دی کارکردگی تے حکمتِ عملی دے حوالے نال جامع رہنمائی ݙیندی اے۔ انھاں ایں ڳالھ دی وی نشاندہی کیتی جو سینیٹ آف پاکستان وی اپݨی سالانہ رپورٹ جاری کریندے، جیڑھی شفافیت تے احتساب دے مشترکہ عزم دی عکاسی کریندی اے تے عوام کوں ادارہ جاتی کارکردگی توں باخبر رکھیندی اے۔ چیئرمین سینیٹ نیب دی سالانہ رپورٹ 2025 دے نمایاں نکات دا حوالہ ݙیندے ہوئیں 6 کھرب روپے توں ودھ دی تاریخی ریکوری دی تعریف کیتی ، جیڑھی 1999 اچ ادارے دے قیام دے بعد ساریں توں وݙی سالانہ وصولی اے ۔ انھاں آکھیا جو اے کامیابی قومی وسائل تے عوامی سرمائے دے تحفظ کیتے نیب دے عزم دا واضح ثبوت اے۔انھاں رپورٹ اچ مالی ریکوری کوں ادارہ جاتی اصلاحات، ڈیجیٹل جدت تے عوام دوست اقدامات نال جوڑݨ دے عمل دی تعریف کریندے اینکوں ہک دور اندیش حکمتِ عملی قرار ݙتا، جیڑھی بدعنوانی توں پاک پاکستان دے وژن نال مطابقت رکھیندی اے تے عوامی اعتماد کوں مزید تکڑا بݨیندی اے۔ چیئرمین سینیٹ ایں عزم دا اعادہ کیتا جو بدعنوانی مکاوݨ تے احتساب دے ودھارے کیتے نیب دی مسلسل کوششاں پاکستان دی ترقی تے استحکام کیتے ناگزیر ہن۔ انھاں یقین ݙوایا جو سینیٹ ایں اہم قومی مشن اچ نیب دے نال مکمل تعاون جاری رکھیسی ۔ انھاں اداریں وچال موثر تعاون دی اہمیت تے زور ݙیندے آکھیا جو تکڑی حکمرانی تے عوام کوں انصاف ݙیوݨ کیتے سانجھیاں کوششاں ناگزیر ہن۔ انھاں ایں امید دا اظہار وی کیتا جو سینیٹ تے نیب وچال تعاون مستقبل اچ مزید ودھسی تے چیئرمین نیب اپݨیاں ذمہ واریاں ایں جذبے تے لڳن نال ادا کریندے رہسن، خصوصاً بدعنوانی مکاوݨ تے بے ضابطگیاں دے سدِباب کیتے۔ سید یوسف رضا گیلانی چیئرمین نیب کیتے نیک خواہشات دا اظہار وی کیتا تے امید کیتی جو او پاکستان اچ احتساب دے عمل کوں مزید بہتر بݨیسن ۔ چیئرمین نیب سید یوسف رضا گیلانی دی ڳالھ نال اتفاق کریندے آکھیا جو پاکستان اچ شفافیت ودھاوݨ تے پاکستان دے سارے اداریں کوں کرپشن توں پاک کرݨ کیتے ہر ممکن اقدام چاتا ویسی ۔ ایں موقع تے سینیٹ دی قائمہ کمیٹی خزانہ دے چیئرمین سینیٹر سلیم مانڈوی والا تے سینیٹ دی فنکشنل کمیٹی انسانی حقوق دی چیئرپرسن سینیٹر ثمینہ ممتاز زہری وی موجود ہن۔