حکومت ملک اچ معیاری تے ہکو جھئیں تعلیمی موقع ݙیوݨ کیتے عملی اقدامات کریندی پئی اے، وفاقی وزیر تعلیم ڈاکٹر خالد مقبول صدیقی

اسلام آباد۔ 2 اپریل (اے پی پی) وفاقی وزیر تعلیم و پیشہ ورانہ تربیت ڈاکٹر خالد مقبول صدیقی آکھیے جو تعلیم قومی ترقی دی بنیاد اے، حکومت ملک اچ معیاری تے ہکو جھئیں تعلیمی موقع ݙیوݨ کیتے عملی اقدامات کریندی پئی اے۔ او اسلام آباد ماڈل کالج طالبات (پوسٹ گریجویٹ) جی 10/4 اچ منعقد تھیوݨ آلے کانووکیشن نال خطاب کریندے پئے ہن جتھاں انھاں بطور مہمانِ خصوصی شرکت کیتی تے فارغ التحصیل طالبات اچ اسناد ونڈیاں ۔ وفاقی وزیر طالبات کوں انھاں دی تعلیمی کامیابیاں تے مبارخ ݙیندے آکھیا جو اے کامیابیاں انھاں دی محنت، اساتذہ دی رہنمائی تے والدین دیاں دعاواں دا نتیجہ ہن۔ انھاں اساتذہ تے ادارے دی انتظامیہ دی کوششاں دی وی تعریف کیتی۔ انھاں آکھیا جو تعلیم ہر فرد دا بنیادی حق اے تے ایندی فراہمی بلا امتیاز یقینی بݨاوݨ حکومت دی اولین ترجیح اے ۔ انھاں آکھیا جو قومی ترقی کیتے تریمتاں کوں تعلیم دے ہکو جھئیں موقع ݙیوݨ ناگزیر اے کیوں جو تعلیم یافتہ تریمتاں ہک تکڑے تے خوشحال معاشرے دی تشکیل اچ کلیدی کردار ادا کریندن۔ بعد اچ میڈیا نال ڳالھ کریندے ڈاکٹر خالد مقبول صدیقی آکھیا جو وزارتِ وفاقی تعلیم و پیشہ ورانہ تربیت تعلیمی اصلاحات دے ایجنڈے تے عمل پیرا اے تے جدید تقاضیں نال ہم آہنگ تعلیم دے ودھارے کیتے اقدامات کیتے ویندے پئن۔ انھاں آکھیا جو ہنر مندی دی تعلیم، ڈیجیٹل لرننگ تے اساتذہ دی پیشہ ورانہ تربیت تے خصوصی توجہ ݙتی ویندی پئی اے ۔ انھاں فارغ التحصیل طالبات کوں تلقین کیتی جو او اپݨیاں صلاحیتاں کوں کم اچ گھن آندے ہوئیں ملک و قوم دی ترقی اچ مثبت کردار ادا کرن ۔ تقریب دے چھیکڑ اچ نمایاں کارکردگی دا مظاہرہ کرݨ آلی طالبات اچ اعزازات تے اسناد ونڈیاں ڳئیاں۔