وزیراعظم دا جنگی صورتحال پاروں قومی یکجہتی، اتحاد و اتفاق تے سیاسی استحکام دی لوڑھ تے زور، ہݨ اشرافیہ کوں قربانی ݙیوݨی پوسی، وفاقی تے صوبائی سطح تے گھٹ اہم منصوبیں تے کم روکݨا ہوسی، اجلاس نال خطاب

اسلام آباد۔ 2 اپریل (اے پی پی) وزیراعظم محمد شہباز شریف خطے اچ جنگی صورتحال پاروں معاشی اوکھ دا ذکر کریندے قومی یکجہتی، اتحاد و اتفاق، سیاسی استحکام تے رل تے چیلنجز نال نبٹݨ دی لوڑھ تے زور ݙتا تے آکھیے جو ہݨ اشرافیہ کوں قربانی ݙیوݨی پوسی، وفاق تے صوبے گھٹ اہم منصوبیں کوں روکن تاں جو عام آدمی دا تحفظ کیتا ونڄ سڳے، کفایت شعاری کرتے فنڈز جمع کرݨے پوسن، زرعی شعبے، پبلک و گڈز ٹرانسپورٹ کوں بچاوݨا ہوسی تاں جو عام آدمی مہانگ توں گھٹ توں گھٹ متاثر تھیوے، وفاق ہݨ تئیں 129 ارب روپے دا ٻوجھ چا چکئے، پاکستان جنگ بندی کیتے جتنی تھی سڳے کوشش کریندا پئے، اللہ دی مہربانی نال خطے اچ امن قائم تھیسی۔اے ڳالھ انہاں خطے دی موجودہ صورتحال دے حوالے نال منعقد تھیوݨ آلے اجلاس نال خطاب کریندے آکھی۔ ایں موقع تے نائب وزیراعظم تے وزیر خارجہ اسحاق ڈار، فیلڈ مارشل سید عاصم منیر، وفاقی وزراء، چارے صوبیں تے گلگت بلتستان دے وزراء اعلیٰ، آزاد کشمیر دے وزیراعظم، پاکستان پیپلزپارٹی دے چیئرمین بلاول بھٹو زرداری وی موجود ہن ۔ وزیراعظم آکھیاخطے اچ جنگ ݙوجھے مہینے اچ داخل تھی چکی اے، اساکوں شہادتاں تے ٻہوں افسوس اے، اساں اپݨے تعزیتی پیغامات مختلف ویلھے اچ جاری کیتن، خطے اچ جنگ دے شعلے ٹھڈے کرݨ کیتے پاکستان مخلص دوست تے بھرا ملک دے طور تے بھرپور کوششاں کیتیاں ۔ نائب وزیراعظم و وزیر خارجہ محمد اسحاق ڈار ایران دے اپݨے ہم منصب تے ٻئے ملکاں دے وزراء خارجہ نال کئی واری ڳالھ مہاڑ کیتی اے ۔ او ایں حوالے نال ٻہوں محنت کریندے پئن۔ انھاں چین دا دورہ کیتا، انھاں کوں ٻانہہ تے دھک وی لڳے لیکن انھاں ایندی پرواہ کائنی کیتی۔وزیراعظم آکھیا جو ایں طرح چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر وی کلیدی کردار ادا کریندے پئن، پاکستان جنگ بندی کراوݨ کیتے جتنی تھی سڳے کوششاں کیتن تے اے کوششاں ہݨ وی جاری ہن، اللہ تعالیٰ دے فضل و کرم نال ایندے اچ کامیابی حاصل تھیسی ۔ وزیراعظم آکھیا پاکستان ٻئے ملکاں وانڳوں ایں جنگ توں ٻہوں متاثر تھیندا پئے، معاشی ترقی کیتے اساں ساریں پچھلے ݙو سال دے دوران رل تے ٻہوں کوششاں کیتیاں تے پاکستان دی معیشت کوں میکرو سطح تے مستحکم بݨا ݙتے، ایں ویلھے ترقی تے خوشحالی دا ویلھا آچکے لیکن بدقسمتی نال ایں جنگ دی وجہ توں اساکوں معاشی طور تے ٻہوں اوکھ دا سامݨا اے ۔ نائب وزیراعظم تے وزیر خارجہ تے فیلڈ مارشل دی کوششاں نال اساݙے ݙو بحری جہاز آبنائے ہرمز توں گزرئن، پاکستانی پرچم بردار مزید 20 بحری جہازاں کوں وی آبنائے ہرمز توں گزارݨ دا انتظام کیتا ڳئے، آندے کجھ ݙینھ اچ ایں حوالے نال وی پیش رفت تھیسی۔وزیراعظم آکھیا جو جݙاں جنگ دا خطرہ منڈلیندا پیا ہئی تاں میں مختلف اجلاس منعقد کیتے تے اساݙی ٹیم چارے صوبیں دے وزراء اعلیٰ نال ملاقاتاں کیتیاں تے انھاں کوں ساری صورتحال دا ݙسایا ۔ پہلے ہفتے اچ اساکوں پٹرولیم مصنوعات دی قیمتاں اچ 55 روپے دا اضافہ کرݨا پیا، پاکستان دے محنتی کساناں، مزدوراں تے دکانداراں کیتے اے بے پناہ معاشی ٻوجھ ہئی لیکن انھاں اینکوں برداشت کیتا، اجتماعی تے بھرپور کوششاں نال اساں ویلھے تے صورتحال دا ادراک کیتا تے اقدامات چاتے، کابینہ دے ارکان اپݨی ݙو مہینے دی تنخواہ نہ گھنݨ دا فیصلہ کیتا، تیل دی کھپت اچ 50 فیصد دی کٹوتی کیتی ڳئی، پارلیمنٹ دے ارکان وی ایندے اچ حصہ پاتا، تیل دی بچت کیتے 60 فیصد گاݙیاں دا استعمال بند کر ݙتا ڳئے۔ ایں سلسلے اچ پاکستان پیپلز پارٹی دے چیئرمین بلاول بھٹو زرداری دے وی شکر گزار ہیسے جوانھاں ایں معاملے اچ خصوصی دلچسپی ڳھدی، انھاں کوں اساں معاملات توں باخبر کیتا، صدرِ مملکت دے وی شکر گزار ہیسے جو انھاں اجلاس سݙئے تے چنڳے ماحول اچ معاملات دا جائزہ ڳھدا ڳئے۔وزیراعظم آکھیا جو وفاقی حکومت ترائے ہفتے اچ 129 ارب روپے ݙتن، پی ایس ڈی پی اچ 100 ارب روپے دی کٹوتی کیتی ڳئی اے تے سارے خرچے وفاق برداشت کیتن۔ وزیراعظم آکھیا جو ویلھا آڳئے جو سارے رل تے تعاون کرن، سارے وزراء اعلیٰ دا شکریہ ادا کریندوں جو انہاں ایوانِ صدر اچ تھیوݨ آلے اجلاس اچ بھرپور تعاون دا یقین ݙوایا، کفایت شعاری مہم اچ صدرِ مملکت، بلاول بھٹو زرداری، وزراء اعلیٰ تے ارکانِ پارلیمنٹ دے کردار دی تعریف کریندوں ، اے ہک ٻہوں وݙی قومی یکجہتی اتحاد و اتفاق دی علامت اے کیوں جو ایندے بغیر کوئی وی قوم اتنے وݙے چیلنج دا مقابلہ کائنی کر سڳدی۔ وزیراعظم آکھیا جو اساکوں عام آدمی تے غریب طبقے دا تحفظ کرݨا اے، اشرافیہ کوں ایثار تے قربانی دا مظاہرہ کرݨا چاہیدے ۔ وزیراعظم آکھیا جو وفاقی تے صوبائی سطح تے ایجھے منصوبے جنہاں تے اساں کم روک سڳدوں انھاں کوں روکݨا چاہیدے تے فنڈز دی بچت کرتے عام آدمی تے غریب آدمی دے تحفظ تے خرچ کرݨے چاہیدن۔وزیراعظم آکھیا جو سیاسی استحکام توں ہی معاشی استحکام ممکن اے، ایں ویلھے ساریں توں ودھ توجہ کمزور طبقے دے نال نال زرعی شعبے دے تحفظ تے ݙیوݨ دی لوڑھ اے، کݨک دی کٹائی دا کم شروع تھیوݨ آلا اے ایندے کیتے ڈیزل تے پٹرول دی لوڑھ اے، فصلاں رہاوݨ کیتے وی ڈیزل دی لوڑھ ہوسی، عام آدمی کوں مہانگ توں بچاوݨ کیتے پبلک و گڈز ٹرانسپورٹ دے شعبے کوں وی بچاوݨا ہوسی تاں جو عام آدمی تے ٻوجھ نہ پووے، ایندے کیتے رل تے کفایت شعاری کرتے فنڈز جمع کرݨے پوسن۔