وفاقی وزیرتجارت دا متحدہ عرب امارات دے وزیر غیر ملکی تجارت نال ورچوئل اجلاس

اسلام آباد۔ 3 اپریل (اے پی پی) وفاقی وزیر تجارت جام کمال خان متحدہ عرب امارات دے وزیر غیر ملکی تجارت ثانی بن احمد الزیودی نال اہم ورچوئل اجلاس اچ ݙو پاسہ تجارتی تعلقات کوں مزید فروغ ݙیوݨ دے عزم دا اعادہ کیتے۔ اجلاس اچ پاکستان تے متحدہ عرب امارات دے درمیان طویل المدتی دوستانہ تعلقات تے تجارتی شراکت داری تے زور ݙتا ڳئے۔ ݙوہیں فریقین تجارتی سہولتاں ہموار بݨاوݨ، لاجسٹک ہم آہنگی کوں بہتر کرݨ تے مارکیٹ تائیں رسائی اچ ودھارے کیتے مشترکہ اقدامات تے اتفاق کیتے۔پاکستان-یو اے ای ورچوئل اجلاس اچ وزیراعظم دے کوآرڈینیٹر تجارت رانا احسان افضل، سیکرٹری تجارت جواد پال تے وزارت دے سینئر حکام وی شریک ہن ۔ اجلاس دے دوران پٹرولیم مصنوعات، خوراک تے ٻئی اہم تجارتی چیزاں سودھے مختلف شعبیں اچ تعاون ودھاوݨ دے امکانات دا جائزہ ڳھدا ڳئے۔ وفاقی وزیر تجارت دبئی تے ابوظہبی اچ یو اے ای دی سفارتی تے نجی شعبے دی معاونت تے پاکستان دی طرفوں شکریہ ادا کیتا، جیندے اچ ڈی پی ورلڈ دا تعاون وی شامل اے۔ ایں موقع تے متحدہ عرب امارات دے وزیر برائے غیر ملکی تجارت پاکستان نال اپݨے ملک دی تکڑی وابستگی کوں دہرایا تے سانجھے مفاد، ہم آہنگی تے اقتصادی تعاون کوں مزید وسعت ݙیوݨ دی اہمیت تے زور ݙتے۔ ݙوہیں فریقین ایں ڳالھ تے وی اتفاق کیتا جو آندے ہفتے اپݨی متعلقہ ٹیماں دے ذریعے عملی تے لاجسٹک امور تے مزید مشاورت کیتی ویسی تاں جو سانجھے تجارتی موقع کوں موثر انداز اچ ودھایا ونڄ سڳے