وزیراعظم دا پٹرول تے لیوی اچ 80 روپے گھٹاوݨ دا اعلان، سارے وسائل تے توانائیاں عوامی بھلائی سانڳے وقف کریسوں، شہباز شریف

لاہور۔ 4 اپریل (اے پی پی) وزیراعظم محمد شہباز شریف پٹرول تے لڳی ہوئی لیوی اچ وقتی طور تے 80 روپے گھٹاوݨ، وفاقی کابینہ دے ارکان دی طرفوں 6 مہینے دیاں تنخواہواں قومی خزانے اچ جمع کراوݨ، موٹر سائیکل مالکان کوں 100 روپے فی لیٹر سبسڈی ݙیوݨ، چھوٹے کساناں کوں 1500 روپے فی ایکڑ امداد، ریلویز دی اکانومی کلاس دا کرایہ نہ ودھاوݨ، مال بردار چھوٹے ٹرکاں کوں 70 ہزار، وݙے ٹرکاں کوں 80 ہزار روپے، تے پبلک ٹرانسپورٹ دے طور تے چلݨ آلی بساں کیتے ہک لکھ روپے ماہانہ سبسڈی ݙیوݨ سودھے عوامی ریلیف کیتے کئی اہم اعلانات کریندے آکھیے جو حکومت کوں عوامی اوکھ دا احساس اے، سارے وسائل تے توانائیاں عوامی بھلائی سانڳے وقف کریسوں تے حالات معمول تے آوݨ تائیں آرام نال نہ ٻہسوں ۔ وفاقی تے صوبائی حکومتاں رل تے عوامی اوکھ اچ کمی کیتے تِکھے تِکھے کم کریسن۔ قوم نال خطاب کریندے وزیراعظم آکھیا جو او اڄ ہک واری ول ایجھے اوکھے حالات اچ عوام نال مخاطب ہن جݙاں خلیج اچ جنگ جاری اے تے ایندی وجہ توں پورے خطے اچ تیل دی قیمتاں آسمان نال ڳالھیں کریندیاں پئن۔ تیل دیاں قیمتاں اچ ٻہوں ودھارے پاکستان کوں وی اپݨی وکیڑ اچ گھن رکھیے تے اے ہک ایجھی کوڑی حقیقت اے جو غریب دا چولہا مدھم تھیندا پئے، کسان کیتے ٻہوں اوکھ تھی چکی اے ہݨ عام آدمی کیتے نویں چیلنجز سامݨے آندے پئن۔وزیراعظم آکھیا جو انھاں اللہ تعالیٰ دے فضل و کرم نال تے قوم دیاں دعاواں نال جتنی تھی سڳے کوشش کیتی اے جو عوامی بھلائی کیتے تے عوام دی اوکھ گھٹ کرݨ کیتے جیڑھے تھوڑے ٻہوں قومی وسائل ہن انھاں کوں صرف کیتا ونڄے تاں جو ہک ہک پیسے دی بچت نال عوام کوں مہانگ دے طوفان توں بچایا ونڄ سڳے ۔وزیراعظم آکھیا جو اڄ عالمی منڈیاں اچ تیل دی قیمتاں اچ حیران کن ودھارا تھی چکیے تے مہانگ دنیا دی طاقتور معیشتاں دی وی کنڈ بھن ݙتی اے، پاکستان وی ایندے توں متاثر تھیندا پئے لیکن پچھلے ترائے ہفتے اچ انھاں عوام دے اتے روزانہ تھیوݨ آلے تیل دی قیمتاں دے ودھارے دا ٻوجھ پاوݨ بالکل مناسب کائنی سمجھیا کیوں جو او چنڳی طرح جاݨدن جو پاکستان اچ ہک عام آدمی کیں طرح زندگی گزریندن۔ فجر دی نماز پڑھ تے لوک رزقِ حلال دی ڳول اچ نکلدن تے سارا ݙینھ پالا تے دھپ اچ محنت کرتے اپݨے ٻالاں دا پیٹ رزقِ حلال نال پلیندن لیکن ایندے باوجود عوام دے ٻہوں زیادہ مسائل ہن، ایہو وجہ اے جو انھاں ترائے ہفتے اچ قومی وسائل توں 129 ارب روپے خرچ کر تے عوام تائیں مہانگ دے ایں قیامت خیز طوفان کوں پڄݨ کائنی ݙتا۔وزیراعظم آکھیا جو اساں سارے اللہ تعالیٰ توں دعا گو ہیں جو اے جنگ وقتی بند تھی ونڄے تے امن قائم تھیوے، ایندے کیتے پاکستان دی حکومت، او خود، نائب وزیراعظم و وزیر خارجہ تے فیلڈ مارشل سید عاصم منیر ٻہوں مخلص دل نال کوششاں کریندے پئن۔ جݙاں توں جنگ شروع تھئی اے اساں ݙینھ رات کوششاں کریندے پیوں تے ایں ویلھے تائیں اے فرض نبھیندے رہسوں جݙاں تائیں جنگ دے شعلے وسم کائنی ویندے۔وزیراعظم آکھیا جو کل قومی مشاورت دے حوالے نال وزیر خزانہ تے وزیر پٹرولیم آندے ویلھے کیتے اعلانات کیتے، ایندے پچھوں بھرپور مشاورت تھئی ہئی۔ صدرِ مملکت دا شکریہ ادا کرینداں جنھاں پوری قومی قیادت کوں ایوانِ صدر اچ دعوت ݙتی جتھاں چارے صوبیں دے وزرائے اعلیٰ، آزاد جموں و کشمیر دے وزیراعظم، گلگت بلتستان دے نگران وزیراعلیٰ، میں خود، فیلڈ مارشل سید عاصم منیر تے ٻئے وݙے لوک موجود ہن تے اتھاں بھرپور مشاورت تھئی ہئی۔ ایندے توں اڳلے ݙینھ وزیراعظم ہاؤس اچ مکمل مشاورت کیتی ڳئی تے ول کل ہک بھرپور اجلاس اچ جیندے اچ چارے صوبیں دے وزرائے اعلیٰ تے وفاقی وزراء شریک ہن ، ٻہوں عرق ریزی دے نال فیصلیں دے بعد ہک جامع پروگرام دا اعلان کیتا ڳئے۔وزیراعظم آکھیا جو اڄوکے ہفتے تے ݙینھاں اچ کجھ ملکاں اچ تیل دی میلاں لمبی قطاراں ݙیکھݨ اچ آئیاں ہن تے کیں طریقے نال اتھاں لوکاں کوں ٻہوں تکلیف تھئی اے لیکن الحمدللہ پاکستان اچ خدائے بزرگ و برتر دی کمال مہربانی نال اساں انھاں سارے معاملات کوں سنبھالی رکھیے۔ اجتماعی کوششاں تے وقتی فیصلیں دے تحت کل دے اعلانات موجب موٹر بائیکس کوں ہک لیٹر پٹرول تے 100 روپے دی سبسڈی ݙتی ویسی ۔ اے فیصلہ کیتا ڳیا جو گڈز ٹرانسپورٹ تے پبلک ٹرانسپورٹ اچ مال بردار گاݙیاں کوں سہولت ݙیوݨ کیتے ہک مہینے تائیں 100 روپے فی لیٹر دے حساب نال سبسڈی ݙتی ویسی، چھوٹے ٹرکاں کوں 70 ہزار روپے، وݙے ٹرکاں کوں 80 ہزار روپے تے مسافر بساں یعنی پبلک ٹرانسپورٹ کوں ہک لکھ روپے ماہانہ سبسڈی ݙتی ویسی تاں جو کھاوݨ پیوݨ دیاں چیزاں دی قیمتاں تے کرائے ٻوجھ عوام تے نہ پووے، جݙاں جو چھوٹے کساناں کیتے 1500 روپے فی ایکڑ امداد ݙیوݨ دا اعلان کیتا ڳئے۔انھاں آکھیا جو پاکستان ریلویز دے حوالے نال میں اے فیصلہ کیتے جو اکانومی کلاس دے مسافراں کیتے بالکل کرایہ کائناں ودھایا ویسی تے ایں حوالے نال وزارتِ ریلوے کوں واضح ہدایات جاری کر ݙتیاں ڳئن۔ وزیراعظم آکھیا جو او موجودہ اعلانات تے جیڑھے کل اعلانات کیتے ڳئے انھاں سارے قومی جذبات نال بھرئے اقدامات کیتے صوبائی وزرائے اعلیٰ مریم نواز شریف، سید مراد علی شاہ، سہیل آفریدی تے میر سرفراز بگٹی صاحب دا تہہ دل توں شکریہ ادا کریندن جنھاں ایں قومی مقصد کیتے اپݨے وسائل مہیا کرݨ کیتے بلا تاخیر عزم دا اظہار کیتے۔وزیراعظم آکھیا جو او سمجھدن جو ایہو وقت دی آواز اے تے اے او موقع اے جو جئیں ویلھے ایں تاریخ دے ٻہوں وݙے چیلنج دا مقابلہ صرف تے صرف قومی یکجہتی تے اتفاق و اتحاد نال ہی کیتا ونڄ سڳدے۔ انھاں آکھیا جو اے سارے اعلانات جیڑھے کیتے ڳئن انھاں دا اطلاق گلگت بلتستان تے آزاد کشمیر تے وی تھیسی جیندے کیتے وسائل انشاء اللہ وفاقی حکومت خوشی نال ݙیسی۔وزیراعظم آکھیا جو انھاں کوں پوری طرح احساس اے جو انھاں اقدامات دے باوجود وی اگرچہ عوام دی اوکھ اچ کمی تاں ضرور آسی لیکن روزمرہ دی ضروری اشیاء کیتے عوام کوں ایندے توں کئی زیادہ وسائل وی مہیا کیتے ونڄن تاں او وی کافی کائناں ہوسن، لیکن او سچے دل نال اکھیندے پئن جو عوام نال وعدہ اے جو اساں اوں ویلھے تئیں آرام نال نہ ٻہسوں جݙاں تئیں حالات ول معمول تے واپس کائنی آویندے، انشاء اللہ اساں ساری توانائیاں تے سارے وسائل ایں کم کیتے عوام دے قدماں اچ ڈھیر کریسوں ۔ ایں سوچ دے تحت میں اے اعلان کریندا پیاں جو پٹرول دی لیوی اچ وقتی طور تے 80 روپے فی لیٹر کمی کیتی ویندی پئی اے تے ایں طرح اڄ رات 12 وڄے توں پٹرول دی قیمت 458 روپے فی لیٹر توں گھٹ تھی تے 378 روپے فی لیٹر تھی ویسی۔ ایندا اطلاق ہک مہینے کیتے ہوسی ۔ انھاں آکھیا جو وفاقی حکومت تے چارےصوبائی حکومتاں رل تے عوام دی اوکھ گھٹ کرݨ کیتے کم کریندیاں رہسن۔وزیراعظم آکھیا جو انھاں کابینہ دے ارکان نال تکھے ایندا مشورہ کائنی کیتا لیکن کابینہ دے ارکان پہلے ݙو مہینے دی تنخواہ قومی خزانے اچ جمع کراوݨ دا اعلان کر چکن، اینکوں میں اڄ ودھا تے 6 مہینے کرݨ دا اعلان کرینداں، اے شاید ہک ٻہوں ہی تھوڑی رقم ہوسی لیکن ایندے نال عوام کوں مخلصانہ انداز اچ اے یقین ݙیواوݨ چاہنداں جو انشاء اللہ سارے وسائل جتھوں جتھوں ہک ہک پیسے دی بچت تھیسی او بچت حاصل کرتے عوام دی اوکھ اچ ودھارا نہ تھیوݨ ݙیساں، اللہ تعالیٰ کوں منظور تھیا تاں انشاء اللہ ٻہوں وقتی اساں ٻہوں چنڳے وقتاں اچ ترقی، خوشحالی تے غربت مکاوݨ دیاں ڳالھیں کریندے پئے ہوسوں۔