شہید ذوالفقارعلی بھٹوپاکستان دی جمہوری، سماجی تے دفاعی بنیاداں کوں تکڑا بݨاوݨ اچ تاریخی کردار ادا کیتا، چیئرمین سینیٹ سید یوسف رضا گیلانی

اسلام آباد۔ 4 اپریل (اے پی پی) چیئرمین سینیٹ سید یوسف رضا گیلانی آکھیے جو شہید ذوالفقار علی بھٹو ہک عہد ساز، مدبر تے عوام دوست رہنما ہن جنھاں پاکستان دی جمہوری، سماجی تے دفاعی بنیاداں کوں تکڑا بݨاوݨ اچ تاریخی کردار ادا کیتے۔ شہید ذوالفقار علی بھٹو دے نظریات، انھاں دے پیغامِ امید تے عوام نال وابستگی کوں یاد کریندے اساکوں ایں عہد دی تجدید کرݨی چاہیدی اے جو اساں آئین تے جمہوری اصولاں دی روشنی اچ ہک تکڑے، خوشحال تے ترقی یافتہ پاکستان دے قیام کیتے اپݨی جدوجہد جاری رکھیسوں ۔سینیٹ سیکرٹریٹ توں جاری بیان موجب بانی پاکستان پیپلز پارٹی تے سابق وزیراعظم شہید ذوالفقار علی بھٹو دی 47 ویں برسی دے موقع تے اپݨے خصوصی پیغام اچ چیئرمین سینیٹ آکھیا جو شہید بھٹو ہک عہد ساز شخصیت ہن۔چیئرمین سینیٹ آکھیا جو شہید ذوالفقار علی بھٹو ملک اچ جمہوریت کوں مستحکم کیتا تے عوام کوں حقیقی معنی اچ اقتدار دا سرچشمہ بݨایا۔ انھاں دی قیادت اچ 1973 دا متفقہ آئین تشکیل پاتا جیڑھا اڄ وی پاکستان دے جمہوری نظام، وفاقی استحکام تے عوامی حقوق دی ضمانت اے۔ انھاں مزید آکھیا جو بھٹو شہید آئین دی بالادستی، جمہوری اقدار تے عوامی حقوق کیتے ہمیشہ اصولی جدوجہد کیتی تے کساناں، مزدوراں تے تریمتاں دی موثر آواز بݨیے۔ سید یوسف رضا گیلانی آکھیا جو شہید بھٹو دی بصیرت افروز قیادت تے انقلابی سوچ پاکستان کوں ترقی، خودانحصاری تے عوامی فلاح دی رستے تے ٹورئے۔ انھاں پسماندہ طبقیں کوں قومی دھارے اچ شامل کرتے انھاں کوں بااختیار بݨاوݨ کیتے عملی اقدامات کیتے، جیندے نتیجے اچ صنعت، معیشت تے تعلیم دے شعبیں اچ نمایاں پیش رفت تھئی اے۔انھاں آکھیا جو دفاعِ وطن کوں تکڑا بݨاوݨ کیتے شہید بھٹو دے تاریخی فیصلے، خصوصاً پاکستان دے ایٹمی پروگرام دی بنیاد رکھݨ، قومی سلامتی کیتے سنگِ میل ثابت تھئے۔ ایں طرح انھاں دی متحرک خارجہ پالیسی پاکستان کوں عالمی سطح تے باوقار تے خودمختار شناخت ݙتی، جݙاں جو اسلامی سربراہی اجلاس دی میزبانی امتِ مسلمہ دے اتحاد کوں ودھارا ݙتا۔ چیئرمین سینیٹ آکھیا جو شہید بھٹو دی خدمات دا اعتراف نہ صرف پاکستان بلکہ عالمی سطح تے وی کیتا ویندے۔انھاں دی جدوجہد، قربانیاں تے عوامی خدمت دا جذبہ اج وی قوم کیتے مشعلِ راہ اے۔ انھاں شہید محترمہ بے نظیر بھٹو دی خدمات کوں وی خراجِ تحسین پیش کریندے آکھیا جو انھاں جمہوریت دے ودھارے تے عوامی حقوق دے تحفظ کیتے مثالی جدوجہد کیتی تے مسلم دنیا دی پہلی تریمت وزیراعظم بݨ تے نویں تاریخ رقم کیتی۔سید یوسف رضا گیلانی مزید آکھیا جو صدرِ مملکت آصف علی زرداری جمہوری روایات کوں مستحکم کریندے پارلیمانی نظام کوں تقویت ݙتی، جݙاں جو 18 ویں آئینی ترمیم جیھے اقدامات صوبیں کوں خودمختاری تے ہکو جھیں حقوق ݙیوݨ یقینی بݨائے۔ انھاں ایں ڳالھ تے وی روشنی پاتی جو چیئرمین پاکستان پیپلز پارٹی بلاول بھٹو زرداری نینگر قیادت دے طور تے جمہوری اقدار تے عوامی خدمت دے ودھارے کیتے متحرک کردار ادا کریندے پئن۔ چیئرمین سینیٹ آکھیا جو پاکستان پیپلز پارٹی جمہوریت تے آئین دی بالادستی کیتے بے مثال قربانیاں ݙتن۔ چھیکڑ اچ انھاں آکھیا جو اڄ دے ݙینھ اساکوں شہید ذوالفقار علی بھٹو دے نظریات کوں یاد کریندے ایں عہد دی تجدید کرݨی چاہیدی اے جو اساں ہک خوشحال پاکستان دے قیام کیتے اپݨی جدوجہد جاری رکھیسوں