حساس علاقائی صورتحال اچ میڈیا پلیٹ فارمز درست معلومات کیتے صرف سرکاری بیانات تے انحصار کرن، ترجمان دفترِ خارجہ

اسلام آباد۔ 4 اپریل (اے پی پی) ترجمان دفترِ خارجہ طاہر اندرابی آکھیے جو حساس علاقائی صورتحال اچ سفارتکاری ایں ڳالھ دی تقاضا کریندی اے جو احتیاط تے ذمہ داری دا مظاہرہ کیتا ونڄے، میڈیا پلیٹ فارمز مناسب احتیاط ورتن، قیاس آرائیاں توں پرہیز کرن تے درست تے وقتی معلومات کیتے صرف سرکاری طورتے جاری کیتے ڳئے بیانات تے انحصار کرن ۔ خطے اچ جاری جھیڑے متعلق پیشرفت بارے میڈیا دے سوالاں دے جواب اچ وزارتِ خارجہ دے ترجمان آکھیا جو میڈیا بالخصوص سوشل میڈیا تے چلݨ آلیاں کئی رپورٹاں اساݙے علم اچ آئن جنھاں اچ جاری جھیڑے تے امن و مکالمے دے ودھارے کیتے پاکستان دی کوششاں دے بارے اچ مبینہ نام نہاد سرکاری ذرائع دا حوالہ ݙتا ڳئے۔ترجمان آکھیا جو اساں انھاں بے بنیاد تے آپوݨ گھڑئے دعویں کوں مکمل طور تے مسترد کریندوں جیڑھے مبینہ سرکاری ذرائع نال منسوب کیتے ویندے پئن، ایں حوالے نال کہیں وی قسم دی نسبت درست کائنی۔ ترجمان آکھیا جو اے ڳالھ تشویش دا باعث اے جو وزارتِ خارجہ اچ تھیوݨ آلی بریفنگ کوں غلط انداز اچ پیش کیتا ڳئے تے ایجھے معاملات دی طرف اشارہ کیتا ڳئے جنھاں تے نہ تاں ڳالھ تھئی ہئی تے نہ ہی کوئی حوالہ ݙتا ڳیا ہئی۔ ایں حساس علاقائی صورتحال اچ سفارتکاری تقاضا کریندی اے جو احتیاط تے ذمہ داری دا مظاہرہ کیتا ونڄے لہٰذا اساں سارے میڈیا پلیٹ فارمز توں درخواست کریندوں جو او مناسب احتیاط ورتن، قیاس آرائیاں توں پرہیز کرن تے درست معلومات کیتے صرف سرکاری بیانات تے میڈیا ریڈ آؤٹس تے انحصار کرن۔