سیالکوٹ۔ 4 اپریل (اے پی پی) وفاقی وزیرِ دفاع خواجہ محمد آصف آکھیے جو قوم دعا کرے جو ایران تے امریکہ جنگ بندی تے امن کیتے پاکستان اپݨا کردار ادا کریندے سرخرو تھیوے تے ایں خطے اچ امن قائم تھیوے تے مسلم ملکاں وچال اختلافات ختم تھیون۔ انھاں آکھیا جو مذاکرات کتھاں تئیں پڄن ایندے تے فی الحال تبصرہ کرݨ مناسب کائنی۔ انھاں اے ڳالھ سیالکوٹ اچ فیصل موٹرزدے افتتاح …
بھارت دی کہیں وی جارحیت دا بھرپورجواب ݙتا ویسی،وزیرِ دفاع خواجہ محمد آصف
سیالکوٹ۔ 4 اپریل (اے پی پی) وفاقی وزیرِ دفاع خواجہ محمد آصف آکھیے جو قوم دعا کرے جو ایران تے امریکہ جنگ بندی تے امن کیتے پاکستان اپݨا کردار ادا کریندے سرخرو تھیوے تے ایں خطے اچ امن قائم تھیوے تے مسلم ملکاں وچال اختلافات ختم تھیون۔ انھاں آکھیا جو مذاکرات کتھاں تئیں پڄن ایندے تے فی الحال تبصرہ کرݨ مناسب کائنی۔ انھاں اے ڳالھ سیالکوٹ اچ فیصل موٹرزدے افتتاح دے موقع تے آکھی۔ ایں موقع تے میڈیا نمائندگان نال ڳالھ مہاڑ کریندے وزیرِ دفاع آکھیا جو امتِ مسلمہ ہک نبی حضرت محمد ﷺ دے منݨ آلی اے تے انھاں دی سنت ﷺ تے عمل کریندی پئی اے۔ اللہ تعالیٰ توں دعا اے جو امت کوں تفرقہ بازی توں نجات ݙیوے۔ انھاں آکھیا جو امتِ مسلمہ اچ ایں ویلھے جتنی اتحاد دی لوڑھ اے، شاید اتنی پچھلے 1400 سال اچ کائناں ہئی۔وفاقی وزیرِ دفاع بھارت دی طرفوں جارحیت دے حوالے نال آکھیا جو ہک سال پہلے بھارت فالس فلیگ دہشت گردی دی کارروائی کرتے ایندا ملبہ پاکستان تے پاوݨ دی کوشش کیتی تے پاکستان تے جنگ مسلط کیتی، جیندے جواب پاکستان بھارت دے اندر ونڄ تے ݙتا تے ذلت و رسوائی بھارت دا مقدر بݨی۔ انھاں آکھیا جو بھارت دی اپݨی عوام اپݨے حکمراناں کوں تنقید دا نشانہ بݨیندی پئی اے، کیوں جو پاکستان اپݨے توں ہر لحاظ نال وݙے دشمن کوں منہ بھن جواب ݙتا۔ انھاں واضح کیتا جو جے بھارت ول ایجھی کوئی کوشش کیتی تاں پاکستان بھرپور جواب ݙیسی تے انھاں کوں مار مار تے کلکتہ چھوڑ تے آسی۔ صوبائی وزیرِ محنت محمد منشاء اللہ بٹ، ارکانِ صوبائی اسمبلی چوہدری فیصل اکرام تے رانا عارف ہرناہ سودھے لوکاں دی ٻہوں وݙی تعداد شرکت کیتی۔ تقریب اچ معزز مہماناں فیصل موٹرز دے قیام کوں نجی شعبے اچ ہک مثبت ودھارا قرار ݙیندے آکھیا جو ایندے نال کاروباری سرگرمیاں ودھسن۔
