پاکستان دی سمندری سلامتی کیتے تکڑی بحریہ ناگزیر اے، چیف آف نیول سٹاف ایڈمرل نوید اشرف

راولپنڈی۔ 4 اپریل (اے پی پی) چیف آف نیول سٹاف ایڈمرل نوید اشرف، این آئی، این آئی (ایم)، ٹی بی ٹی ہک تکڑی، متوازن تے ٹیکنالوجی نال لیس جدید بحریہ دی اہمیت تے زور ݙیندے آکھیے جو تجارت تے توانائی دے اہم سمندری راہداریاں دے نال پاکستان دی اسٹریٹجک جغرافیائی پوزیشن ہک طاقتور بحریہ دا تقاضا کریندی اے تاں جو قومی مفادات دی حفاظت کیتی ونڄے تے سمندری لائنز آف کمیونیکیشن (ایس ایل او سیز) کوں محفوظ رکھیا ونڄے۔ پاکستان نیوی دے ٻیڑے اچ ݙوجھی پی این ملجم کلاس کوریویٹ، پی این ایس خیبر دی شمولیت دی تقریب دے دوران خطاب کریندے نیول چیف واضح کیتا جو مَعرکَہ حق دے دوران پاکستان نیوی انڈین نیوی دے طیارہ بردار جہاز کوں غرق کرݨ کیتے پوری طرح تیار ہئی، جیندی وجہ توں انڈین نیوی اپݨی محفوظ پناہ گاہواں اچ رہݨ تے مجبور تھی ڳئی۔ مَعرکہ حق دے دوران بحری آپریشنز دی مہارت ہک واضح پیغام ݙیندی اے جو پاکستان دے سمندری مفادات کوں چیلنج کرݨ دی کہیں وی کوشش دا مناسب جواب ݙتا ویسی۔نیول چیف آکھیا جو پاکستان نیوی کوں جدید ترین پلیٹ فارمز تے جدید ٹیکنالوجیز نال لیس کیتا ویندا پئے، جیڑھا اینکوں دشمن دے اہم انفراسٹرکچر تے بحری اثاثیں کوں نشانہ بݨاوݨ دے قابل بݨیندی پئی اے۔ پی این ایس خیبر جہیں جدید پلیٹ فارمز تے آوݨ آلی ہینگر کلاس آبدوزاں دی شمولیت پاکستان نیوی دی جدید سازی اچ ہک اہم سنگِ میل اے، جیڑھی آپریشنل لچک تے جنگی طاقت کوں مزید ودھیندی پئی اے۔ اپݨے خطاب دے چھیکڑ اچ نیول چیف پی این ایس خیبر دے عملے کوں مبارخ ݙتی تے پاکستان نیوی دے ایں عزم دا اعادہ کیتا جو او خودمختار سمندراں دا دفاع کریسی تے سمندری سرحداں دا محافظ بݨݨ دی اپݨی ذمہ واری نبھیندا رہسی۔