نیشنل ایمرجنسیز آپریشن سینٹر دی طرفوں ملک اچ کھمݨ گاجاں نال مزید مینھ تے برف باری دا الرٹ جاری

اسلام آباد۔ 4 اپریل (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر ملک اچ کھمݨ گاجاں نال مینھ تے برف باری دا الرٹ جاری کر ݙتا، اڳلے 12 توں 24 گھنٹے دے دوران ملک دے زیادہ ترعلاقیں اچ تکھی ہوا ، اندھاری جھکڑ دے نال مزید مینھ وسݨ دا امکان اے ۔ جاری الرٹ موجب خیبرپختونخوا دے مختلف علاقیں بشمول پشاور، نوشہرہ، چارسدہ تے مردان اچ مزید چھل دی صورت حال دا ݙر اے۔ اڳلے 12 توں 24 گھنٹے دے دوران گلگت بلتستان، آزاد کشمیر تے خیبرپختونخوا دے اُتلے تے پہاڑی علاقیں اچ برف باری وی متوقع اے۔ پنجاب، بلوچستان تے خیبرپختونخوا دے علاقیں اچ کھمݨ نال مینھ، اندھاری، طوفان تے کجھ جہیں تے گڑھا وسݨ دا امکان اے۔خیبرپختونخوا دے مختلف ضلعیں اچ وی اڳلے 12 توں 24 گھنٹے دے دوران کھمݨ نال مینھ تے اندھاری دا امکان اے۔ چترال، دیر، سوات، کالام، منگورہ، بٹگرام، پشاور، مانسہرہ، ایبٹ آباد، ہری پور، صوابی، نوشہرہ، مردان، چارسدہ، کوہاٹ، کرک، بنوں، لکی مروت، ٹانک، ڈی آئی خان تے وزیرستان اچ وی اندھاری، جھکڑ دے نال مینھ متوقع اے۔ اسلام آباد سودھے پنجاب دے شہراں بشمول مری، راولپنڈی، اٹک، گوجرخان، جہلم، چکوال، گجرات، گوجرانوالہ، حافظ آباد، سیالکوٹ تے منڈی بہاؤالدین اچ اڳلے 12 توں 24 گھنٹے اچ اندھاری جھکڑ تے کھمݨ گاجاں نال مینھ متوقع اے۔ نارووال، سرگودھا، جھنگ، فیصل آباد، لاہور، ساہیوال، قصور، اوکاڑہ، بورے والا، ڈی جی خان، ملتان تے بہاولپور اچ وی مینھ متوقع اے۔گلگت بلتستان تے آزاد کشمیر دے علاقیں اسکردو، ہنزہ، گلگت، گھانچے، استور، دیامر، خرمنگ، شگر، غزر، نگر، مظفرآباد، باغ، راولاکوٹ، حویلی، پونچھ، کوٹلی، میر پور، بھمبر، تے وادی نیلم اچ وی مینھ وسݨ دا امکان اے ۔ بلوچستان دے شہراں کوئٹہ، ژوب، لورالائی، ڈیرہ بگٹی، زیارت، قلات، قلعہ سیف اللہ، قلعہ عبداللہ، چمن، پشین، بارکھان، سبی، ڈیرہ بگٹی، نوشکی، خضدار، آواران، واشک، پنجگور، تربت، گوادر تے لسبیلہ اچ اڳلے 12 توں 24 گھنٹے دے دوران اندھاری تے تکھی ہوا نال مینھ متوقع اے۔ملک اچ تکھی ہوا، آسمانی بجلی تے ژالہ باری کمزور تعمیرات، وݨ ، کھڑیاں فصلاں تے بجلی دی لائناں کوں ضیان پڄا سڳدی اے۔ مینھ پاروں سڑکاں تلکݨ دا شکار، ٹریفک دی روانی متاثر تھیوݨ دا ݙراے۔ پہاڑی علاقیں اچ برف باری توں ٹریفک دی روانی متاثر تھیوݨ دا امکان اے، مسافر احتیاط کرن۔ پہاڑی علاقیں اچ مسلسل مینھ پاروں لینڈ سلائیڈنگ دے خطرات اچ وی ودھارے دا ݙر اے۔ شہری غیر ضروری سفر توں پرہیز کرن، گاݙی احتیاط نال چلاون تے موسمی ہدایات تے عمل کرن۔ تکھی ہوا تے طوفان دے دوران وݨ ، کمزور تعمیرات تے تنصیبات توں پرے رہن ۔ سیاح تے مسافر شمالی علاقیں دے سفر کرݨ توں پہلے موسم تے سڑکاں دی صورتحال ضرور چیک کرن ۔ عوام این ڈی ایم اے دی آفیشل ایپ ‘پاک این ڈی ایم اے ڈیزاسٹر الرٹ’ توں وقتی معلومات حاصل کرن ۔ این ڈی ایم اے سارے صوبائی تے ضلعی اداریں کوں ممکنہ موسمی صورتحال نال نبٹݨ کیتے الرٹ رہݨ دی ہدایت کر ݙتی اے۔