صدرِمملکت دی پاکستان اچ رہݨ آلے مسیحی شہریاں تے دنیا بھر دی مسیحی برادری کوں ایسٹر دی مبارخ

اسلام آباد۔ 5 اپریل (اے پی پی) صدرِ مملکت آصف علی زرداری پاکستان اچ رہݨ آلے مسیحی شہریاں تے دنیا دی مسیحی برادری کوں ایسٹر دے موقع تے دلی مبارخ پیش کریندے آکھیے جو اے ݙینھ ہمدردی، امید، تجدید، ازسرِ نو زندگی، تازگی، نجات، زندگی دی موت تے چنڳی دی برائی تے فتح دا واضح پیغام ݙیندے، پاکستان اچ اے اقدار محض نظریاتی کائنی بلکہ عملی زندگی اچ نظر آندن، مسیحی مرد و تریمتاں اساݙے سکولاں، ہسپتالاں، سرکاری خدمات تے مسلح افواج اچ خدمات انجام ݙیندے پئن، خاندان ایں ݙینھ کوں عبادت تے سانجھے میل جول دے ذریعے منیندن ، انھاں دی خدمات اساݙے معاشرے دے معمول دے نظام دا حصہ ہن تے اے اعتراف تے احترام دے مستحق ہن۔ایوانِ صدر دے پریس ونگ توں جاری بیان موجب صدر زرداری آکھیا جو پاکستانی مسیحیاں کوں وطن کیتے انھاں دی خدمات دی وجہ توں قدر تے احترام دی نگاہ نال ݙٹھا ویندے ۔ اساں اڄ وی پنجاب اسمبلی دے مسیحی سپیکر ایس پی سنگھا دے قیامِ پاکستان اچ تاریخی کردار کوں یاد رکھیندوں۔ ہر پاکستانی 1965 دی جنگ اچ سیسل چوہدری دے بہادرانہ کردار کوں وی یاد رکھیندے۔ میں پاکستانی مسیحی برادری دی قومی ترقی اچ مسلسل خدمات، خصوصاً تعلیم، صحت، قومی دفاع تے سماجی خدمات دے شعبیں اچ کردار دی تعریف کرینداں ۔ قائداعظم محمد علی جناح ریاست کیتے ہک واضح سمت متعین کیتی ہئی، جیڑھی سارے شہریاں کیتے مذہب تے نسل توں بالا تھی تے مساوات، آزادی تے تحفظ تے مبنی اے۔ اے اصول پاکستان دے آئین اچ شامل ہن، جیڑھا ہر شہری کوں برابر دے حقوق تے تحفظ دی ضمانت ݙیندے۔صدر زرداری آکھیا جو میں ایں ڳالھ دا اعادہ کرینداں جو ریاست دی ذمہ واری اے جو پاکستان اچ ساری برادریاں انھاں حقوق توں مکمل طور تے مستفید تھیون۔ حکومت اقلیتی برادریاں دی جان، مال، عزت تے سلامتی دے تحفظ تے انھاں دی فلاح و بہبود کیتے پُرعزم اے۔ ایں موقع تے میں سارے شہریاں کوں تلقین کرینداں جو او ہک ݙوجھے دے نال تحمل، احترام تے ذمہ داری دے نال پیش آون۔ ہک تکڑا تے مستحکم معاشرہ ایں ڳالھ تے منحصر ہوندے جو اساں روزمرہ زندگی، کم دیاں جاہواں، محلے تے اداریں اچ ہک ݙوجھے دے نال کئیں طرح دا ورتاؤ کریندوں