چیئرمین سینیٹ سید یوسف رضا گیلانی دی مسیحی برادری کوں ایسٹر دی مبارخ

اسلام آباد۔ 5 اپریل (اے پی پی) چیئرمین سینیٹ سید یوسف رضا گیلانی ایسٹر دے پُرمسرت موقع تے دنیا بھر اچ وسݨ آلی مسیحی برادری کوں دلی مبارخ ݙیندے نیک تمناواں دا اظہار کیتے۔ سینیٹ سیکرٹریٹ توں جاری اپݨے پیغام اچ چیئرمین سینیٹ آکھیا جو ایسٹر مسیحی برادری کیتے روحانی تجدید، امید تے محبت دا عظیم تہوار اے، جیندے موقع تے خصوصی عبادات تے دعائیہ تقریبات دا اہتمام کیتا ویندے ۔ انھاں آکھیا جو اے موقع نہ صرف روحانی وابستگی کوں تکڑا کرݨ دا ذریعہ اے بلکہ معاشرے اچ محبت، رواداری تے بھرپی دے ودھارے دا وی اہم پیغام ݙیندے۔سید یوسف رضا گیلانی مسیحی برادری تے زور ݙتا جو او اپݨی خصوصی عبادات اچ پاکستان دی سلامتی، امن، استحکام تے خوشحالی کیتے دعاواں کرن تے نال ہی اپݨے مذہبی اجتماعات دے ذریعے بین المذاہب ہم آہنگی، برداشت تے اخوت دا پیغام عام کرن انھاں ایں عزم دا اعادہ کیتا جو پاکستان اچ اقلیتاں کوں مکمل مذہبی آزادی حاصل اے تے او اپݨی عبادت گاہواں اچ بغیر کہیں خوف و خطر اپݨی مذہبی رسومات ادا کریندے پئن۔ چیئرمین سینیٹ آکھیا جو آئینِ پاکستان اقلیتاں دے حقوق دا ضامن اے تے ایں حوالے نال موثر قانون سازی وی کیتی ڳئی اے تاں جو سارے شہریاں کوں برابر دے حقوق حاصل ہوون۔انھاں مزید آکھیا جو پاکستان پیپلز پارٹی ہمیشہ اقلیتاں دے حقوق دے تحفظ تے انھاں دی آواز کوں موثر انداز اچ اجاگر کرݨ کیتے کردار ادا کیتے۔ پارلیمنٹ اچ قائم مختلف کمیٹیاں دے ذریعے اقلیتاں کوں درپیش مسئلیں دے حل کیتے سنجیدہ تے موثر اقدامات کیتے ویندے پئن۔ اپݨے پیغام دے چھیکڑاچ چیئرمین سینیٹ ہک واری ول دنیا بھر دی مسیحی برادری کوں ایسٹر دی مبارخ ݙیندے انھاں کیتے امن، خوشی تے کامیابی دی دعا وی کیتی اے۔