حکومت مارکیٹ اچ نظم و ضبط، شفافیت تے عوام کوں ریلیف ݙیوݨ کیتے پوری طرح پُرعزم اے، پروفیسر احسن اقبال

اسلام آباد۔ 5 اپریل (اے پی پی) وفاقی وزیر منصوبہ بندی، ترقی، اصلاحات و خصوصی اقدامات پروفیسر احسن اقبال آکھیے جو حکومت مارکیٹ اچ نظم و ضبط، شفافیت تے عوام کوں ریلیف ݙیوݨ کیتے پوری طرح پُرعزم اے، قیمتاں اچ استحکام صرف ہک معاشی ترجیح کائنی بلکہ اے عوام نال اساݙا وعدہ اے۔ وزارتِ منصوبہ بندی موجب وفاقی وزیر پروفیسر احسن اقبال آکھیا جو پیٹرولیم مصنوعات دی قیمتاں اچ اڄوکے ودھارے دے تناظر اچ قومی پرائس مانیٹرنگ کمیٹی دا ہک اہم اجلاس سݙیا ڳیا جیندا مقصد عوام کوں غیر ضروری مالی دٻاؤ توں تحفظ ݙیوݨ کیتے موثر تے فیصلہ کن اقدامات کوں یقینی بݨاوݨ ہئی۔ اجلاس اچ روزمرہ زندگی کوں متاثر کرݨ آلے سارے عوامل بشمول بنیادی ضروری چیزاں توں گھن تے ٹرانسپورٹ دے کرائےتئیں دا جامع جائزہ ڳھدا ڳیا تے ایں حوالے نال متعلقہ اداریں کوں واضح، وقتی تے قابلِ عمل ہدایات جاری کیتیاں ڳئن۔وفاقی وزیر آکھیا جو ذخیرہ اندوزی تے ناجائز منافع خوری دے خلاف زیرو ٹالرنس پالیسی تے سختی نال عملدرآمد جاری اے۔ انھاں آکھیا جو یوریا کھاد دی سمگلنگ دے خلاف فوری تے موثر کریک ڈاؤن کوں وی یقینی بݨایا ویندا پئے ۔ پروفیسر احسن اقبال آکھیا جو ہفتہ وار مانیٹرنگ سسٹم دے تحت ہر جمعہ کوں این پی ایم سی دے اجلاس منعقد کیتے ویسن ۔ انھاں مزید آکھیا جو پبلک ٹرانسپورٹ دے کرائے تے کڑی نظر رکھی ویندی پئی اے تاں جو بلاجوازودھارا روکیا ونڄ سڳے۔ حکومت دی طرفوں صوبیں کوں ہدایت کیتی ڳئی اے جو کرائے دا تعین موجودہ سبسڈیز موجب یقینی بݨیندے سارے صوبیں اچ کرایہ نامیں دا وقتی اجراء کیتا ونڄے۔ وفاقی وزیر آکھیا جو ضلعی انتظامیہ کوں ہدایت کیتی ڳئی اے جو ضروری چیزاں دی تھوک تے پرچون قیمتاں دا باقاعدگی نال اعلان کیتا ونڄے۔ پروفیسر احسن اقبال آکھیا جو وفاقی حکومت دے مربوط اقدامات ایں عزم دی عکاسی کریندن جو حکومت مارکیٹ اچ نظم و ضبط، شفافیت تے عوام کوں ریلیف ݙیوݨ کیتے پوری طرح پُرعزم اے۔