حج 2026 دے انتظامات مکمل، پروازاں 18 اپریل توں شروع تھیسن، وفاقی وزیر سردار محمد یوسف

اسلام آباد۔ 5 اپریل (اے پی پی) وفاقی وزیر مذہبی امور سردار محمد یوسف اعلان کیتے جو حج 2026 دے انتظامات مکمل ہن، ہک لکھ 80 ہزار حجاج کرام کیتے کوئی اضافی خرچ کائناں کیتا ویسی، پروازاں 18 اپریل توں شروع تھیسن، جنھاں اچ مثالی انتظامات کیتے ڳئن تے موجودہ سروسز دے نال نواں لاہور روٹ وی شامل کر ݙتا ڳئے۔ خصوصی ڳالھ مہاڑ کریندے ہوئیں وفاقی وزیر آکھیا جو حج 2026 دے سارے انتظامات موثر طریقے نال مکمل کیتے ویندے پئن تے ایندے اچ کوئی اضافی لاڳت کائناں لاتی ویسی۔انھاں اعلان کیتا جو ایں سال کل ہک لکھ 80 ہزار زائرین حج ادا کریسن، جنھاں اچ ہک لکھ 20 ہزار سرکاری کوٹے دے تحت تے 60 ہزار پرائیویٹ انتظامات دے ذریعے شامل ہن۔ ایندے نال سارے اہل زائرین کوں منصفانہ موقع ملدے رہسن ۔ ایں سال دے انتظامات تے روشنی پیندے انھاں نواں لاہور توں سعودی عرب دا روٹ متعارف کراوݨ دا اعلان کیتا، جیڑھا زائرین کیتے سفر کوں سوکھا بݨیسی جݙاں جو ٻئے شہراں توں فلائٹس اپݨے مقررہ شیڈول موجب جاری رہسن ۔ وفاقی وزیر تاکید کیتی جو سارے آپریشنز بشمول فلائٹس، رہائش تے ٹرانسپورٹ کوں ہموار تے مثالی انداز اچ منظم کیتا ویسی تاں جو سارے حجاج دی راحت تے حفاظت کوں یقینی بݨایا ونڄ سڳے۔ انھاں آکھیا جو وزارتِ مذہبی امور پرائیویٹ کمپنیاں نال نیڑے رابطے اچ رہسی تاں جو عمرہ سروسز، رہائش، کھاوݨ پیوݨ تے ٹرانسپورٹ کوں منظم کیتا ونڄ سڳے۔ زائرین کوں اعلیٰ معیار دے انتظامات ݙیوݨ دی ہر ممکن کوشش کیتی ویندی پئی اے تے وزارت دا مقصد اے جو ایں سال دا حج انتظامات تے سہولتاں دے لحاظ نال مثالی تجربہ بݨے۔ وفاقی وزیر پاکستان تے سعودی عرب وچال تعلقات دی وی ول تصدیق کیتی تے میزبان ملک دی طرفوں پاکستانی زائرین کیتے کیتے ڳئے انتظامات تے تعاون دی تعریف کیتی۔ انھاں آکھیا جو ایں سال پاکستان دا پورا کوٹہ استعمال کیتا ویسی جݙاں جو مثالی معیار برقرار رکھیا ویسی، جیڑھا ݙوہیں حکومتاں دی طرفوں محفوظ تے یادگار حج دے تجربے کوں سوکھا بݨاوݨ دے عزم دی عکاسی کریندے ۔ ہک سوال دے جواب اچ انھاں آکھیا جو پہلے حج دا روٹ کراچی توں اسلام آباد ہوندا ہئی، ہݨ نواں لاہور توں سعودی عرب دا روٹ شامل کر ݙتا ڳئے تاں جو زائرین کیتے سفر سوکھا تھی سڳے، جݙاں جو ٻئے شہراں توں فلائٹس اپݨے مقررہ شیڈول موجب جاری رہسن۔