وزیرِدفاع خواجہ محمد آصف سیالکوٹ اچ ارباں روپے دے میگا ترقیاتی منصوبیں دا افتتاح کرݙتا

سیالکوٹ۔ 05 اپریل (اے پی پی) وزیرِ دفاع خواجہ محمد آصف ضلع کیتے ارباں روپے دے میگا ترقیاتی منصوبیں دا افتتاح کر ݙتا۔ افتتاحی تقریب دے موقع تے میڈیا نال ڳالھ مہاڑ کریندے وزیرِ دفاع خواجہ محمد آصف آکھیا جو وزیراعلیٰ پنجاب مریم نواز دی خصوصی توجہ نال شہر اچ ترقیاتی کماں دا پیکج ݙتا ڳئے، آوݨ آلے ترائے سالاں اچ شہرِ اقبال دی شکل و صورت اچ واضح تبدیلی آسی ۔ انھاں آکھیا جو اے ترقی دا سفر مریم نواز دی قیادت اچ جاری رہسی، آوݨ آلے الیکشن اچ ہک ایجھا رپورٹ کارڈ گھن تے آسوں جیندے اچ ملک ترقی دے رستے تے گامزن تھیسی۔وزیرِدفاع بھارت کوں واضح پیغام ݙیندے آکھیا جو بھارت بوکھلاہٹ دا شکار اے، بھارت حواس باختہ تھی چکیے، بھارت پہلگام جہیا فالس فلیگ آپریشن کیتا تاں اساں کلکتہ تئیں پڄا تے آسوں۔ وزیرِ دفاع خواجہ محمد آصف ترقیاتی منصوبیں دے حوالے نال ݙسایا جو ایں پیکج اچ اقبال منزل دے چوفیر 16 ارب روپے توں ودھ دی لاڳت دا تزئین و آرائش دا منصوبہ وی شامل اے، جݙاں جو شہر دی صفائی تے نظام دی بہتری کیتے 64 کروڑ روپے دی جدید مشینری دی منظوری ݙتی ڳئی اے۔ پچھلے سال چھل توں تھیوݨ آلی تباہی دے پیشِ نظر شہر دے نالیں دی تعمیرِ نو دا کم تکھے نال جاری اے تاں جو سیالکوٹ کوں مستقل طور تے محفوظ بݨایا ونڃ سڳے۔ تاریخی ورثے دی بحالی کیتے قلعہ سیالکوٹ تے 30 کروڑ دی لاڳت نال پارک جݙاں جو اقبال منزل دی اپ گریڈیشن تے 10 کروڑ روپے خرچ کیتے ویسن ۔ شہر اچ 380 ڈسپوزل اسٹیشنز دی تعمیر نال نکاسی آب دے مسئلے وی حل تھیسن وزیرِ دفاع مشرقِ وسطیٰ دی صورتحال تے تشویش دا اظہار کریندے آکھیا جو ایران اسرائیل جنگ دے اثرات توں بچݨ کیتے وݙے فنڈز دی ضرورت پوسی۔