زندگی دے سارے شعبیں اچ مسیحی برادری دی ودھ ساری خدمات تعریف دے لائق ہن، وزیراعظم شہباز شریف

اسلام آباد۔ 5 اپریل (اے پی پی) وزیراعظم محمد شہباز شریف مسیحی برادری کوں ایسٹر دے تہوار دی مبارخ ݙیندے آکھیے جو زندگی دے سارے شعبیں اچ مسیحی برادری دی ودھ ساری خدمات تعریف دے لائق ہن، ایں ݙینھ دے موقع تے اساں کوں برداشت، سانجھے احترام تے بین المذاہب ہم آہنگی دے ودھارے دے اپݨے عزم دا اعادہ کرݨا چاہیدے۔ سماجی رابطے دی ویب سائٹ “ایکس” تے ہک پیغام اچ وزیراعظم آکھیا جو ایسٹر دے موقع تے پاکستان تے دنیا بھر اچ وسݨ آلے مسیحی بھراویں تے بھیݨاں کوں دلی مبارخ ݙینداں، حضرت عیسیٰؑ دی مقدس تعلیمات اڄ وی لکھاں لوکاں کیتے مشعلِ راہ ہن جیڑھیاں اساں کوں ہک ایجھے معاشرے دی تشکیل دی ترغیب ݙیندن جیڑھا برائیاں توں پاک ہووے تے جتھاں غریباں تے محروم طبقیں نال ہمدردی تے شفقت دا ورتاؤ کیتا ونڄے۔انھاں آکھیا جو اساں زندگی دے سارے شعبیاں اچ مسیحی برادری دی خدمات کوں ٻہوں زیادہ قدر دی نگاہ نال ݙیکھدوں خصوصاً تعلیم، صحت، سماجی بہبود تے عوامی خدمت دے میداناں اچ انھاں دا کردار تعریف دے لائق اے۔ آؤ ایں ݙینھ دے موقع تے اساں برداشت، سانجھے احترام تے بین المذاہب ہم آہنگی دے ودھارے دے اپݨے عزم دا اعادہ کروں تے اپݨے پیارے ملک دے امن و خوشحالی کیتے رل تے کم کروں، مسیحی برادری کوں پُرامن تے خوشیاں بھریا ایسٹر مبارک ہووے۔