لاہور۔ 5 اپریل (اے پی پی) نائب وزیرِاعظم محمد اسحاق ڈار آکھیے جو حضرت داتا گنج بخش دی لازوال صوفیانہ تعلیمات امن، رواداری تے روحانی روشنی دا پیغام ݙیندن، لاہور اچ انھاں دا مزارِ اقدس روحانی رہنمائی دا ہک روشن مینار اے، جتھاں ہر سال لکھاں عقیدت مند حاضری ݙیندن ۔ انھاں اے ڳالھیں مزار تے حاضری دے موقع تے آکھیاں، جتھاں سیکرٹری/چیف ایڈمنسٹریٹر اوقاف پنجاب ڈاکٹر احسان بھٹہ تے …
نائب وزیرِاعظم اسحاق ڈار دا داتا دربار دا دورہ، ترقیاتی منصوبے مکمل کرݨ دی ہدایت
لاہور۔ 5 اپریل (اے پی پی) نائب وزیرِاعظم محمد اسحاق ڈار آکھیے جو حضرت داتا گنج بخش دی لازوال صوفیانہ تعلیمات امن، رواداری تے روحانی روشنی دا پیغام ݙیندن، لاہور اچ انھاں دا مزارِ اقدس روحانی رہنمائی دا ہک روشن مینار اے، جتھاں ہر سال لکھاں عقیدت مند حاضری ݙیندن ۔ انھاں اے ڳالھیں مزار تے حاضری دے موقع تے آکھیاں، جتھاں سیکرٹری/چیف ایڈمنسٹریٹر اوقاف پنجاب ڈاکٹر احسان بھٹہ تے ایڈمنسٹریٹر داتا دربار محمد علی خان انھاں دا پرتپاک استقبال کیتا۔ ایں موقع تے ڈاکٹر احسان بھٹہ انھاں کوں مزار دی توسیع تے تزئین و آرائش دے جاری منصوبے تے تفصیلی بریفنگ ݙتی، جیندے اچ سامݨے دے صحن دی تعمیر، جدید خودکار سایہ دار چھتریاں دی تنصیب، چار کنال رقبے دی مسماری تے ستاراں کنال زمین دا حصول شامل ہن۔نائب وزیرِاعظم حکومتِ پنجاب، بالخصوص وزیراعلیٰ مریم نواز تے چیف سیکرٹری زاہد اختر زمان کوں ایں تاریخی منصوبے تے تعریف کیتی تے اینکوں ہک بصیرت افروز تے عوام دوست اقدام قرار ݙتا۔ انھاں ڈاکٹر احسان بھٹہ دی انتھک محنت، تکڑے نگرانی دے نظام تے منصوبے کوں ہنگامی بنیاداں تے اڳوں ودھاوݨ دے انداز دی وی تعریف کیتی تے محکمہ اوقاف دی طرفوں ایں مقدس جاہ دی روحانیت تے تقدس کوں برقرار رکھیندے جدید سہولتاں ݙیوݨ دے عزم کوں تعریف دے قابل قرار ݙتا۔ انھاں ترقیاتی کماں دی رفتار، اعلیٰ معیار تے مربوط منصوبہ بندی تے اطمینان دا اظہار کیتا تے متعلقہ اداریں کوں ہدایت ݙتی جو کم کوں مزید تکھا کیتا ونڄے تے جولائی اچ تھیوݨ آلے عرس توں پہلے اہم منصوبے مکمل کیتے ونڄن۔ ایں موقع تے سیکرٹری اوقاف و انتظامیہ دے رلے اسحاق ڈار فاتحہ خوانی کیتی تے ملکی ترقی، اتحاد تے استحکام کیتے خصوصی دعاواں کیتیاں۔
