مسیحی برادری دی ملک کیتے ودھ ساری خدمات ہن، وفاقی وزیر اطلاعات و نشریات عطا اللہ تارڑ

لاہور۔ 5 اپریل (اے پی پی) وفاقی وزیراطلاعات و نشریات عطا اللہ تارڑ پاکستان دے بݨݨ، اینکوں تکڑا کرݨ تے ایندے دفاع اچ مسیحی برادری دی ودھ ساری خدمات دی تعریف کیتی اے۔اڄ لاہور اچ ایسٹر دے حوالے نال منعقد تھئی ہک تقریب نال خطاب کریندے انھاں آکھیا جو اے خدمات قوم دی تاریخ اچ سنہری لفظاں نال لکھیاں ویسن ۔وفاقی وزیر ایں ڳالھ کوں نمایاں کیتا جو مسلح افواج اچ خدمات انجام ݙیوݨ آلے اقلیتی برادریاں دے اہلکار دہشت گردی دے خلاف جنگ اچ اپݨی جاناں دی قربانی ݙیندے پئن۔انھاں ملک اچ تعلیم دے ودھارے اچ مسیحی برادری دے کردار دی وی تعریف کیتی تے اینکوں اعتراف دے لائق ہک ٻئی اہم خدمت قرار ݙتے۔ علاقائی تناظر اچ ملک کوں درپیش موجودہ چیلنجز تے انھاں دے عالمی اثرات دا حوالہ ݙیندے عطا اللہ تارڑ آکھیا جو وزیراعظم شہباز شریف یقین ݙیوائے اے جو حکومت ایں اوکھے ویلھے عوام کوں کلہا کائناں چھوڑیسی۔انھاں مزید آکھیا جو حکومت عوام دا ٻوجھ گھٹ کرݨ کیتے موٹر سائیکل مالکان، پبلک ٹرانسپورٹ آپریٹرز تے گڈز ٹرانسپورٹرز کوں پیٹرولیم مصنوعات تے سبسڈی ݙیندی پئی اے ۔ اسلام آباد تے پورے پنجاب اچ پبلک ٹرانسپورٹ کوں مفت وی کر ݙتا ڳئے۔ وفاقی وزیر آکھیا جو وزیراعظم تے وفاقی حکومت عوام کوں پیش اوکھ توں پوری طرح باخبر ہن تے ریلیف ݙیوݨ کیتے ہر ممکن قدم چاوݨ کیتے پرعزم ہن۔