اسلام آباد سیف سٹی کوں “کیپٹل سمارٹ سٹی” اچ تبدیل کرݨ دا فیصلہ، وزیرِ داخلہ 30 مئی دی ڈیڈ لائن ݙے ݙتی

اسلام آباد۔ 6 اپریل (اے پی پی) وفاقی حکومت اسلام آباد سیف سٹی پراجیکٹ دے دائرہ کار کوں وسعت ݙیندے ہوئیں اینکوں مکمل طور تے “کیپٹل سمارٹ سٹی” اچ تبدیل کرݨ دا ٻہوں وݙا فیصلہ کیتے، جیندے تحت وفاقی دارالحکومت اچ پولیسنگ، ٹریفک تے شہری سہولیات دے سارے نظام کوں ہکے ڈیجیٹل پلیٹ فارم تے منتقل کر ݙتا ویسی ۔ وفاقی وزیرِ داخلہ محسن نقوی سیف سٹی ہیڈ کوارٹر دا دورہ کیتا اتے ہک اعلیٰ سطح دے اجلاس دی صدارت کیتی، جیندے اچ منصوبے دے فیز ٹو تے تھیوݨ آلی پیش رفت دا جائزہ گھدا ڳیا۔ اجلاس اچ وفاقی سیکرٹری داخلہ خرم آغا، ڈی جی ایف آئی اے، آئی جی اسلام آباد تے ڈی جی سیف سٹی سمیت ٻئے اعلیٰ حکام شرکت کیتی۔ وزیرِ داخلہ اجلاس دے دوران سیف سٹی ہیڈ کوارٹر دے نویں ڈیزائن دی منظوری ݙتی اتے ہدایت کیتی جو 30 مئی تئیں فیز ٹو دے سارے کم مکمل کیتے ونڄن ۔ انھاں آکھیا جو اسلام آباد دے سنٹرل کمانڈ اینڈ کنٹرول سسٹم کوں اپ گریڈ کیتا ویندا پئے تاں جو ٹریفک مینجمنٹ تے کرائم کنٹرول کیتے جدید ترین ٹیکنالوجی توں فائدہ چاتا ونڃ سڳے۔ آئی جی اسلام آباد پولیس علی ناصر رضوی وزیرِ داخلہ کوں بریفنگ ݙیندیں ہوئیں ݙسایا جو فیز ٹو تے ہݨ تئیں 75 فیصد کم مکمل تھی ڳئے۔ شہر بھر اچ 152 کلومیٹر لمبی فائبر آپٹک کیبل وچھائی ڳئی اے۔ جدید کیمریاں تے مانیٹرنگ سسٹم دے لاوݨ دا عمل آخری مراحل اچ اے اتے 20 مئی توں ٹیسٹنگ دا آغاز کر ݙتا ویسی ۔ ایں موقع تے محسن نقوی دا آکھݨ ہئی جو شہریاں دے تحفظ تے سہولت کیتے سارے وسائل لاتے ویندے پئن۔ انھاں واضح کیتا جو مقررہ مدت دے اندر منصوبے دی تکمیل کوں ہر صورت یقینی بݨایا ویسی تاںجو اسلام آباد کوں عالمی معیار دا محفوظ تے سمارٹ شہر بݨایا ونڃ سڳے۔