حکومت اڄوکے معاشی حالات اچ عوام تے ودھیکی بوجھ پاوݨ توں پرہیز کریندی پئی اے، وزیرِ اعظم شہباز شریف

اسلام آباد۔ 6 اپریل (اے پی پی) وزیرِ اعظم محمد شہباز شریف آکھیا جو حکومت اڄوکے معاشی حالات اچ عوام تے ودھیکی بوجھ پاوݨ توں پرہیز کریندی پئی اے، ریلوے دے نظام کوں بہتر بݨا تے آمدݨ اچ اضافہ کیتا ونڃے۔ اے ڳالھیں انھاں وفاقی وزیر برائے ریلویز حنیف عباسی نال ڳالھ مہاڑ کریندیں ہوئیں کیتا جنھاں سنوار کوں انھاں نال ملاقات کیتی۔ وزیرِ اعظم آفس دے میڈیا ونگ توں جاری بیان دے مطابق ملاقات اچ پاکستان ریلویز دی مجموعی کارکردگی، جاری اصلاحات تے مستقبل دے منصوبیاں تے تفصیلی ڳالھ کیتی ڳئی۔ وزیرِ ریلویز وزیرِ اعظم کوں پاکستان ریلویز دے آپریشنل امور تے بریفنگ ݙیندیں ہوئیں ݙسایا جو خلیج دی صورتحال اچ عوام تے اضافی بوجھ دی وجہ توں عوامی سہولت کوں ݙیکھدیں ہوئیں ملک بھر اچ چلݨ آلی ساری آپریشنل ٹریناں دے کراییاں اچ کہیں قسم دا اضافہ نئی کیتا ویندا پئیا۔ وزیرِ اعظم آکھیا جو موجودہ معاشی حالات اچ حکومت عوام تے اضافی بوجھ پاوݨ توں پرہیز کریندی پئی اے اتے ریلوے دے نظام کوں بہتر بݨا تے آمدݨ اچ اضافہ کرݨ تے توجہ ݙتی ونڃے۔ وزیرِ اعظم پاکستان ریلویز کوں جدید، محفوظ تے قابلِ اعتماد سفری نظام اچ تبدیل کرݨ کیتے اصلاحاتی اقدامات کوں تیکھا کرݨ دی ہدایت کیتی۔ انھاں ایں عزم دا اظہار کیتا جو حکومت عوامی بھلائی دے ایجنڈے تے کاربند اے اتے سارے اداریاں دی کارکردگی کوں بہتر بݨا تے ملک کوں ترقی دی راہ تے ٹوریا ویسی ۔ وزیرِ اعظم وزیرِ ریلویز کوں ہدایت کیتی جو ریلوے دے جاری منصوبیاں دی بروقت تکمیل کوں یقینی بݨایا ونڃے اتے عوام کوں بہتر، محفوظ تے سستی سفری سہولیات فراہم کرݨ کیتے سارے وسائل لاتے ونڄن۔