اسلام آباد۔ 6 اپریل (اے پی پی) وفاقی وزیر برائے منصوبہ بندی، ترقی، اصلاحات و خصوصی اقدامات پروفیسر احسن اقبال دی صدارت معاشی گورننس بارے سنوار کوں اجلاس تھیا جیندے اچ ملک دے معاشی نظام کوں موثر تے سرمایہ کار دوست بݨاوݨ تے تفصیلی غور کیتا ڳیا ۔ وفاقی وزیرِ منصوبہ بندی آکھیا جو معاشی گورننس کوں سادہ، شفاف تے بزنس فرینڈلی بݨاوݨ حکومت دی پہلی قومی ترجیح اے۔ انھاں …
وفاقی وزیر احسن اقبال دی صدارت معاشی گورننس بارے اجلاس، معاشی نظام کوں موثر تے سرمایہ کار دوست بݨاوݨ تے تفصیلی غور
اسلام آباد۔ 6 اپریل (اے پی پی) وفاقی وزیر برائے منصوبہ بندی، ترقی، اصلاحات و خصوصی اقدامات پروفیسر احسن اقبال دی صدارت معاشی گورننس بارے سنوار کوں اجلاس تھیا جیندے اچ ملک دے معاشی نظام کوں موثر تے سرمایہ کار دوست بݨاوݨ تے تفصیلی غور کیتا ڳیا ۔ وفاقی وزیرِ منصوبہ بندی آکھیا جو معاشی گورننس کوں سادہ، شفاف تے بزنس فرینڈلی بݨاوݨ حکومت دی پہلی قومی ترجیح اے۔ انھاں دا آکھݨ ہئی جو ٹیکس نظام کوں ایں انداز اچ ڈھالیا ویندا پئے تاں جو سرمایہ کاری دی حوصلہ افزائی تھیوے اتے کاروباری سرگرمیاں کوں فروغ ملے۔ انھاں آکھیا جو حکومت ہک ایجھا جامع نظام بݨیندی پئی اے جیندے نال پاکستان دی برآمدی صلاحیت اچ نمایاں اضافہ ممکن تھی سڳے۔ ایں سلسلے اچ برآمدات ودھاوݨ آلی کمپنیاں کوں ٹیکس اچ خصوصی مراعات ݙیوݨ دی سفارش وی زیرِ غور اے۔ احسن اقبال زور ݙیندیں ہوئیں آکھیا جو برآمدات دا فروغ ملک کیتے “نیشنل ایمرجنسی” دی حیثیت رکھیندے اتے بیرونی مالی انحصار توں نکلݨ کیتے ضروری اے جو ہر سال ڳھٹ توں ڳھٹ 5 ارب ڈالر دا اضافہ برآمدات اچ کیتا ونڄے۔ انھاں پاکستان دی جغرافیائی اہمیت کوں اجاگر کریندیں ہوئیں آکھیا جو ملک خطے اچ سرمایہ کاری کیتے ہک وݙا مرکز بݨݨ دی صلاحیت رکھیندے ۔ عالمی حالات دے تناظر اچ اسلام آباد کوں محفوظ سرمایہ کاری حب دے طور تے ابھاریا ونڃ سڳدے ۔ اجلاس اچ ایں ڳالھ تے وی زور ݙتا ڳیا جو سرمایہ کاراں کیتے اسلام آباد کوں اولین ترجیحی جاہ بݨاوݨ کیتے پالیسی اقدامات تیکھے کیتے ونڄن۔
