پٹرولیم مصنوعات دے ذخائر، قیمتاں دے رجحان تے ٻئے توانائی امور دا روزانہ دی بنیاد تے جائزہ گھدا ویندا پئے، وزیرِ خزانہ محمد اورنگزیب

اسلام آباد۔ 6 اپریل (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا اے جو پٹرولیم مصنوعات دے ذخائر، قیمتاں دے رجحان تے توانائی متعلق ٻئے امور دا روزانہ دی بنیاد تے جائزہ گھدا ویندا پئے۔ سنوار کوں قومی اسمبلی دے اجلاس اچ ملک اچ پٹرولیم مصنوعات دی صورتحال دے حوالے نال بحث دا آغاز کریندیں ہوئیں وزیرِ خزانہ آکھیا جو فروری دے چھیکڑ اچ جݙاں علاقائی بحران شروع تھیا تاں وزیراعظم کوئی وقت لاتے بغیر اقدامات کیتے، وزیراعظم پوری کابینہ کوں ݙسایا جو ایں بحران دے دوران پیدا تھیوݨ آلی صورتحال دا سامنا فعال تے موثر انداز اچ کرݨے ۔ وزیراعظم ویک اینڈ تے پٹرولیم مصنوعات دی نگرانی کیتے ہک کمیٹی بݨائی جیندے اچ وزیرِ پٹرولیم، وزیرِ بحری امور، وزیرِ قومی غذائی تحفظ، وزیرِ تجارت تے گورنر سٹیٹ بینک شامل ہن ، یکم مارچ توں کمیٹی دے اجلاس روزانہ دی بنیاد تے تھیندے پئن۔ وزیرِ خزانہ آکھیا جو کابینہ کمیٹی دے اجلاس اچ پٹرولیم مصنوعات دے حوالے نال سارے معاملیاں دا احاطہ کیتا ویندا پئے، اجلاس اچ پٹرولیم مصنوعات دے سٹاک، قیمتاں تے ایندے نال نال علاقائی تے عالمی رجحانات دا جائزہ گھدا ویندا پئے، وزیراعظم خود وی ایندی نگرانی کریندے پئن، نائب وزیراعظم دی صدارت اچ وی ہک کمیٹی بݨائی ڳئی اے جیڑھی صورتحال دا جائزہ گھندی پئی اے۔