شہریاں دی انصاف تائیں رسائی کیتے پاکستان اتے ترکیہ ہک ٻئے دے تجربات توں فیدہ چا سڳدن ، وزیراعظم شہباز شریف

اسلام آباد۔ 7 اپریل (اے پی پی) وزیراعظم محمد شہباز شریف آکھیا جو صدیاں تے محیط پاکستان تے ترکیہ دے برادرانہ تعلقات تیکھی رفتار نال ہک جامع معاشی شراکت داری آلے پاسے ویندے پئن، انصاف تائیں رسائی دے حصول کیتے پاکستان تے ترکیہ ہک ٻئے دے تجربات توں فیدہ چا سڳدن ۔ اے ڳالھیں انہاں ترکیہ دی آئینی عدالت دے صدر قادر اوزقایا نال ڳالھ مہاڑ کریندیں ہوئیں کیتا جنھاں منگل کوں اتھاں وفد دے نال انھاں نال ملاقات کیتی۔ وزیراعظم آفس دے میڈیا ونگ توں جاری تھئیے بیان دے مطابق وزیراعظم آکھیا جو شہریاں دی انصاف تائیں رسائی دے حصول کیتے ݙوہیں ملک ہک ٻئے دے تجربات توں فیدہ چا سڳدن ۔ وزیراعظم آکھیا جو ترکیہ دے وفد دے حالیہ دورے دے دوران ایں سلسلے اچ دستخط تھیوݨ آلی مفاہمتی یادداشت ایں منزل آلے پاسے پہلا قدم اے ۔ انصاف دی جلدی فراہمی کیتے ڈیجیٹل ٹیکنالوجی دے استعمال دے سلسلے اچ ݙوہیں ملکاں وچال تجربات دے تبادلے دی ٻہوں وݙی گنجائش موجود اے۔ وزیراعظم آکھیا جو پاکستان تے ترکیہ موسمیاتی تبدیلی، دہشت گردی دے خاتمے، امیگریشن تے ٻئے شعبیاں اچ قوانین تے انھاں دے نفاذ دے سلسلے اچ ہک ٻئے دے تجربات توں فیدہ چا سڳدن۔ ترکیہ دی عدالتی جج دے صدر قادر اوزقایا پاکستان اچ شاندار مہمان نوازی تے شکریہ ادا کیتے۔ انھاں آکھیا جو پاکستان دے نال محبت ہر ترک دی رڳاں اچ رچی ہوئی اے۔ انھاں آکھیا جو ترکیہ دی آئینی عدالت 64 سال پراݨی اے اتے آپݨے ایں وݙے تجربے دے تبادلے کیتے پاکستان دے نال ہک پائلٹ پراجیکٹ شروع کرݨ کیتے تیار اے۔ ملاقات اچ ترکیہ دی آئینی عدالت دے فاضل جج صاحبان، پاکستان اچ ترکیہ دے سفیر عرفان نذیر اوگلو، نائب وزیراعظم اسحاق ڈار، وفاقی وزیرِ قانون اعظم نذیر تارڑ تے ٻئے اعلیٰ حکام وی موجود ہن۔