قازقستان دے سفیر دی وفاقی وزیر اورنگزیب خان کھچی نال ملاقات، ثقافتی تعاون دے فروغ تے ڳالھ مہاڑ

اسلام آباد۔ 7 اپریل (اے پی پی) وفاقی وزیر برائے قومی ورثہ تے ثقافت ڈویژن اورنگزیب خان کھچی نال پاکستان اچ قازقستان دے سفیر یرژان کستافن منگل کوں انھاں دے دفتر اچ ملاقات کیتی ۔ ملاقات دے دوران فریقین ثقافت تے ورثے دے شعبیاں اچ ݙو پاسہ تعاون کوں ٻیا ودھاوݨ دے امکانات تے ڳالھ کیتی۔ قازق سفیر وزیراعظم محمد شہباز شریف دے آوݨ آلے دورہٴ آستانہ توں پہلے مشترکہ ثقافتی پروگراماں دی ریہرسل کیتے پاکستانی ثقافتی وفد بھیڄݨ دی درخواست کیتی اے۔ اے وفد وزیراعظم دے آوݨ تے استقبالیہ تقریب اچ موسیقی دا مظاہرہ پیش کریسی ۔ ملاقات اچ پنجاب توں ایم پی اے جہانزیب خان کچھی وی موجود ہن۔ سفیر ݙسایا جو اے دورہ قازقستان دے صدر دے اڄوکے دورہٴ پاکستان دا تسلسل ہوسی جیندے دوران انھاں وزیراعظم پاکستان کوں آستانہ آوݨ دی دعوت ݙتی ہئی ۔ وفاقی وزیر یقین دہانی کروائی جو گلوکاراں تے قوالاں تے مشتمل ہک ثقافتی وفد قازقستان بھیڄیا ویسی، تے پاکستان دے عالمی شہرت یافتہ قوال ایں موقع تے آپݨی فنکارانہ صلاحیتاں دا مظاہرہ کریسن ۔ سیکریٹری قومی ورثہ تے ثقافت ڈویژن، اسد رحمان گیلانی ایں موقع تے ݙسایا جو وزیر دی ہدایات دے مطابق پاکستان مختلف ملکاں اچ گندھارا تے موہنجو داڑو سویں قدیم تہذیباں دی نمائندگی کرݨ آلے فنِ تعمیر تے دستکاری کوں اجاگر کریندا پئے اتے ضرورت دے مطابق آستانہ اچ وی ایندا مظاہرہ کیتا ویسی۔ سفیر ٻیا ݙسیا جو باہمی مشاورت دے تحت اسلام آباد اچ “سنٹر فار میوزیکل انسٹرومنٹس” دے قیام دا فیصلہ کیتا ڳیا اے اے۔ انھاں دی درخواست تے ایں مرکز کوں پاکستان نیشنل کونسل آف دی آرٹس (PNCA) اچ قائم کرݨ تے اتفاق تھیے ۔ جݙاں جو ایندی باقاعدہ منظوری وزارت دے آوݨ آلے بورڈ آف ڈائریکٹرز دے اجلاس اچ گھدی ویسی ۔ جاری تعاون تے روشنی سٹیندے ہوئیں سفیر آکھیا جو تعلیمی شعبے اچ تعاون کوں پہلے ای فروغ ݙتا ڳئے ۔ جݙاں جو ہݨ ثقافتی شعبے تے ٻئی توجہ ݙتی ویسی ۔ وفاقی وزیر اورنگزیب خان کھچی طے شدہ روڈ میپ دے مطابق ثقافتی تعاون کوں ٻیا اڳوں ودھاوݨ دے عزم دا اظہار کیتے اتے ݙوہیں ملکاں وچال ثقافت دے شعبے اچ طے پاوݨ آلے مفاہمتی یادداشتاں تے عملدرآمد دی یقین دہانی کروائی۔ سفیر لاہور میوزیم تے نیشنل میوزیم کراچی دے دورے اچ وی دلچسپ ظاہر کیتی ۔ جتھاں ݙوہیں ملکاں دے ماہرین مشترکہ طور تے آستانہ اچ منعقد تھیوݨ آلی نمائش کیتے نوادرات دا انتخاب کریسن ۔ وفاقی وزیر وی قازقستان دے ثقافتی وفد کوں پاکستان آوݨ تے آپݨی موسیقی تے رقص دی روایتی پرفارمنس پیش کرݨ دی دعوت ݙتی اتے ݙسایا جو ترکی، تاجکستان تے ٻئے ملکاں دے ثقافتی وفد وی پاکستان دا دورہ کر ڳئن۔ وفاقی وزیر آکھیا جو ثقافتی تبادلے ݙو پاسہ تعاون دا ہک اہم ستون ہن اتے حکومتِ پاکستان وسطی ایشیائی ریاستاں دے نال تعلقات دے فروغ کوں خصوصی اہمیت ݙیندی اے۔