مجموعی معاشی استحکام تے بہتر مالیاتی نظم و ضبط، پاکستان اڄوکے مشکل حالات دا بہتر طریقے نال مقابلہ کیتے، سبسڈی پروگرام دی پہلی قسط جلدی جاری تھیسی، وفاقی وزیرِ خزانہ محمد اورنگزیب دی قومی اسمبلی اچ ڳالھ مہاڑ

اسلام آباد۔ 7 اپریل (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو مجموعی معیشت دے استحکام تے بہتر مالیاتی نظم و ضبط دی وجہ توں پاکستان اڄوکے مشکل حالات دا بہتر طریقے نال مقابلہ کیتے، ہدف تے مبنی سبسڈی پروگرام دی پہلی قسط جلدی جاری تھیسی، حکومت ڈھانچہ جاتی اصلاحات دے پروگرام تے عمل کریندی پئی اے۔ منگل کوں قومی اسمبلی دے اجلاس اچ پٹرولیم مصنوعات دی قیمتاں اچ اضافے تے اڄوکی علاقائی بحران تے بحث کوں نبڑیندیں ہوئیں وزیرِ خزانہ آکھیا جو بحث دے دوران مفید تے تعمیری تجویزاں آئن۔ اساکوں بہتری دی امید اے۔ مگر ایں دے نال نال مشکل حالات کیتے منصوبہ بندی وی کیتی ویندی پئی اے۔ وزیرِ خزانہ آکھیا جو مارچ توں گھن تے ہݨ تائیں جو کجھ تھیے اینکوں حقائق دی نظر توں ݙیکھݨ ضروری اے۔ 14 مارچ توں گھن تے 4 اپریل تائیں دی مدت اچ پٹرولیم مصنوعات دی قیمتاں کوں روکیا ڳیا اتے ایں دوران 129 ارب روپے دی سبسڈی فراہم کیتی ڳئی۔ اے سبسڈی کفایت شعاری تے ٻئے اقدامات دے ذریعے فراہم کیتی ڳئی اے۔ وزارتِ خزانہ ایں تے کم کیتا جݙاں جو وزیراعظم کفایت شعاری اقدامات دے حوالے نال تھرڈ پارٹی آڈٹ دا حکم وی ݙتے ۔ انھاں آکھیا جو پٹرولیم مصنوعات دی قیمتاں تے سبسڈی ݙیوݨ کیتے پی ایس ڈی پی اچ 100 ارب روپے دی کٹوتی کیتی ڳئی۔ کیونجو اساں ہک بحران اچوں گزردے پئیوں ایں کیتے پبلک سیکٹر دے سرکاری ملکیتی اداریاں توں ڈیوڈنڈ تے منافع تے ٻئے ذرائع توں رقم حاصل کیتی ڳئی تے اینویں 129 ارب روپے فراہم کیتے ڳئے۔ وزیرِ خزانہ آکھیا جو محدود وسائل دے نال اساں اتھاں پڄیوں ہݨ ہدف تے مبنی سبسڈی تے عملدرآمد تھیندا پئے۔ موٹر سائیکل سواراں، پبلک ٹرانسپورٹ تے ڈیزل نال چلݨ آلی مال برداری کوں سبسڈی فراہم کیتی ویندی پئی اے۔ وزیرِ خزانہ آکھیا جو زراعت دے شعبے اچ چھوٹے کساناں تے زمینداراں دا خاص خیال رکھا ڳئے۔ صوبیاں دے کول ہک مربوط ڈیٹا موجود اے۔ پنجاب دے کول 8 لکھ کسان کارڈ جݙاں جو سندھ دے کول ہاری کارڈ اے۔ سٹیٹ بینک اتے بینکاں دے سربراہان دے نال میݙی تفصیلی ڳالھ مہاڑ تھئی اے۔ تے ٻہوں جلدی حقداراں کوں سبسڈی دی پہلی قسط مل ویسی۔ وزیرِ خزانہ آکھیا جو حکومت صورتحال دا تفصیل نال جائزہ گھندی پئی اے۔ پٹرولیم دی قیمتاں دی نگرانی کیتے قائم کمیٹی ٻاریک بینی نال کم کریندی پئی اے۔ اساں مختلف ملکاں دی صورتحال دا جائزہ گھندے پئیوں کئی ملکاں اچ راشن بندی تائیں شروع تھی ڳئی اے۔ یو اے ای اچ پٹرول دی قیمت اچ 30 فیصد تے ڈیزل دی قیمت اچ 70 فیصد اضافہ تھیے۔ جݙاں جو بھارت، سری لنکا تے جنوب مشرقی ایشیا دے ملکاں اچ وی پٹرولیم مصنوعات دی قیمتاں ودھ ڳئن۔ اساݙی دعا اے جو خطے اچ امن آوے تے حالات معمول دے مطابق تھی ونڃن ۔ حالات اچ بہتری کیتے پاکستان موثر کردار ادا کریندا پئے۔ وزیرِ خزانہ آکھیا جو کوویڈ تے اڄوکے تجربات توں سکھدے ہوئیں پاکستان سٹرٹیجک ذخائر دی تعمیر تے کم شروع کر ݙتے ۔ ایں بارے اساں ٻئے ملکاں توں ٻہوں کجھ سکھدے پئیوں۔ جݙاں جو توانائی دے شعبے اچ جامع اصلاحات تے وی عملدرآمد تھیندا پئے ۔ ایں وقت سولر توانائی توں 8,000 میگاواٹ بجلی پیدا تھیندی پئی اے۔ وزیراعظم ماحول دوست توانائی دے فروغ کیتے ہک کمیٹی وی تشکیل ݙتی اے۔