وزیراعظم محمد شہباز شریف اتے وفاقی کابینہ دی قوم توں جمعہ کوں جنگ بندی دی مستقل امن اچ تبدیلی تے پاکستان دی ترقی ےء خوشحالی کیتے خصوصی دعاواں دی اپیل

اسلام آباد۔ 8 اپریل (اے پی پی) وزیراعظم محمد شہباز شریف اتے وفاقی کابینہ قوم توں مشرقِ وسطیٰ اچ جنگ بندی تے امن کیتے پاکستان دی کوشِشاں دے مثبت نتائج تے جمعہ کوں اللہ دے حضور سجدہٴ شکر بجا لاوݨ تے جنگ بندی دی مستقل امن اچ تبدیلی تے پاکستان دی ترقی تے خوشحالی کیتے خصوصی دعاواں دی اپیل کیتی اے۔ بدھ کوں وزیراعظم آفس دے میڈیا ونگ توں جاری تھئیے بیان دے مطابق وزیراعظم محمد شہباز شریف دی صدارت وفاقی کابینہ دا اجلاس تھیا، وزیراعظم دی کابینہ اجلاس اچ آمد تے پورا ہال تاڑیاں نال گونج اٹھیا، وزیراعظم تمام کابینہ ارکان دا شکریہ ادا کیتا ۔ وزیراعظم وفاقی کابینہ کوں خلیج اچ جاری کشیدگی دے خاتمے تے جنگ بندی کیتے جاری پاکستان دے اقدامات تے کوشِشاں دے حوالے نال اعتماد اچ گھدا ۔ وفاقی کابینہ وزیراعظم شہباز شریف، نائب وزیراعظم تے وزیرِ خارجہ سینیٹر اسحاق ڈار تے آرمی چیف و چیف آف ڈیفنس فورسز فیلڈ مارشل سید عاصم منیر دی جنگ بندی تے خطے اچ امن دی کوشِشاں تے انھاں کوں خراجِ تحسین پیش کیتا۔ وزیراعظم تے وفاقی کابینہ قوم کوں جمعہ دے ݙینہہ پاکستان دی کوشِشاں دے مثبت نتائج تے اللہ دے حضور سجدہٴ شکر بجا لاوݨ تے جنگ بندی دی مستقل امن اچ تبدیلی تے پاکستان دی ترقی تے خوشحالی کیتے خصوصی دعا کرݨ دی اپیل کیتی اے۔ کابینہ ارکان پاکستان دی سفارتی محاذ تے کوشِشاں تے ایندے تے دنیا بھر اچ پذیرائی کوں تاریخی قرار ݙیندیں ہوئیں ملکی معاشی ترقی کیتے محنت دے مضبوط عزم دا اعادہ کیتے۔ انھاں آکھیا جو پاکستان دی مخلصانہ کوشِشاں دی وجہ توں خطہ مستقل امن دی جانب تیزی نال گامزن اے، وزیراعظم شہباز شریف تے آرمی چیف و چیف آف ڈیفنس فورسز انتہائی کشیدہ تے ناامیدی دی فضا اچ فریقین کوں جنگ بندی تے راضی کر تے دنیا بھر اچ پوری قوم دا سر فخر توں بلند کیتے۔