وزیرِ اعظم دی زیرِ صدارت اجلاس، بجلی دی تقسیم کار کمپنیاں دی نجکاری دے عمل دی رفتار تکھی کرݨ دی ہدایت

اسلام آباد۔ 9 جون (اے پی پی) وزیرِ اعظم محمد شہباز شریف بجلی دی تقسیم کار کمپنیاں دی نجکاری دے عمل دی رفتار تکھی کرݨ دی ہدایت کریندیں ہوئیں آکھیے جو خسارے دا شکار ریاستی ملکیتی اداریاں دی نجکاری حکومت دی ترجیح اے، تمام عمل انتہائی شفاف طریقے نال مکمل کیتا ونڄے۔ او منگل کوں اتھاں آپݨی صدارت بجلی تقسیم کار کمپنیاں (ڈسکوز) دی نجکاری دے حوالے توں جائزہ اجلاس توں خطاب کریندے پئے ہن۔ اجلاس اچ نائب وزیراعظم و وزیرِ خارجہ سینیٹر محمد اسحاق ڈار، وفاقی وزیرِ قانون تے انصاف اعظم نذیر احمد تارڑ، وفاقی وزیرِ اقتصادی امور احد خان چیمہ، وفاقی وزیرِ خزانہ و محصولات محمد اورنگزیب، وفاقی وزیرِ پاور ڈویژن سردار اویس لغاری، مشیرِ وزیرِ اعظم برائے نجکاری محمد علی، وزیرِ مملکت برائے خزانہ تے ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔ وزیرِ اعظم آکھیے جو خسارے دا شکار ریاستی ملکیتی اداریاں دی نجکاری اساݙی ترجیح اے۔ انھاں بجلی تقسیم کار کمپنیاں دی نجکاری دے عمل دی رفتار تکھی کرݨ دی ہدایت کریندیں ہوئیں آکھیے جو نجکاری دے سارے عمل کوں انتہائی شفاف طریقے نال مکمل کیتا ونڄے۔ انھاں ڈسکوز دی نجکاری دے بعد مضبوط ریگولیٹری فریم ورک بݨاوݨ دی وی ہدایت کیتی۔ اجلاس اچ ڈسکوز دی نجکاری دے حوالے توں پیشرفت تے بریفنگ ݙتی ڳئی جئیں دے مطابق پہلے فیز اچ اسلام آباد الیکٹرک سپلائی کمپنی، گوجرانوالہ الیکٹرک پاور کمپنی تے فیصل آباد الیکٹرک سپلائی کمپنی دی نجکاری کیتی ویسی۔ بریفنگ اچ ݙسایا ڳیا جو انھاں تریہے ڈسکوز دی نجکاری دے حوالے توں ایکسپریشن آف انٹرسٹ ملکی و بین الاقوامی اخبارات اچ ݙتا ونڄ چکے  اتے کابینہ دی نجکاری کمیٹی انھاں تریہے ڈسکوز دی نجکاری دے حوالے توں ٹرانزیکشن سٹرکچر دی منظوری وی ݙے ݙتی اے۔ بریفنگ دے مطابق سرمایہ کاراں کوں راغب کرݨ کیتے روڈ شو ایں مہینے توں منعقد کیتے ویندے پئن، سعودی عرب، ترکیہ اتے چین دے سرمایہ کاراں کیتے بین الاقوامی سطح تے وی روڈ شوز منعقد کیتے ویندے پئن۔