سپیکر قومی اسمبلی سردار ایاز صادق نال جنوبی افریقی ہم منصب انجیلا تھوکزلے ڈیڈیزا دی ملاقات

اسلام آباد۔ 17 ستمبر (اے پی پی) سپیکر قومی اسمبلی سردار ایاز صادق نال جنوبی افریقہ دی قومی اسمبلی دی سپیکر انجیلا تھوکزلے ڈیڈیزا ملاقات کیتی۔ ملاقات دولتِ مشترکہ دی پارلیمانی ایسوسی ایشن (سی پی اے) دی 69ویں کانفرنس دے موقع تے تھئی۔ قومی اسمبلی سیکرٹریٹ دے مطابق ملاقات اچ ݙوپاسہ تعلقات کوں ٻیا مستحکم بݨاوݨ سمیت اہم علاقائی تے عالمی معاملیاں تے ڳالھ مہاڑ کیتی ڳئی۔ ݙوہائیں سپیکرز تجارت، سرمایہ کاری، سیاحت دے شعبیاں اچ تعاون تے پارلیمانی روابط کوں فروغ ݙیوݨ تے اتفاق کیتا۔ سپیکر سردار ایاز صادق ݙوہائیں ملکاں دی پارلیمانوں دے درمیان قانون سازی، کمیٹی نظام تے پارلیمانی تجربات دے تبادلے دی ضرورت تے زور ݙتا۔ سپیکر سردار ایاز صادق پاکستان دی گرین پارلیمنٹ، پارلیمانی کاکسز تے کمیٹی نظام کوں مؤثر بݨاوݨ کیتے چاتے ڳئے اقدامات دا ݙسیا اتے آکھیا جو گرین ہاؤس گیساں دے اخراج اچ پاکستان دا حصہ صرف 0.6 فیصد اے، تاہم پاکستان موسمیاتی تبدیلی توں شدید متاثرہ ملکاں اچ شامل اے۔ افغان سرزمین پاکستان دے خلاف دہشت گردی کیتے استعمال تھیندی پئی اے۔ سپیکر سردار ایاز صادق مسئلہ کشمیر دے پرامن حل کیتے پاکستان دے اصولی موقف دا اعادہ کیتا اتے آکھیا جو جنگ کہیں دے مفاد اچ نئیں، تنازعات دا حل مذاکرات تے سفارت کاری دے ذریعے ہووݨا چاہیدے۔ جنوبی افریقہ دی سپیکر ولوں جنوبی افریقہ دا پارلیمانی وفد جلد پاکستان بھیجݨ دی یقین دہانی کروائی ڳئی۔ جنوبی افریقہ دی سپیکر سپیکر سردار ایاز صادق کوں جنوبی افریقہ دے دورے دی دعوت وی ݙتی۔ ݙوہائیں سپیکرز پاکستان تے جنوبی افریقہ وچال پارلیمانی تعلقات ٻئے مستحکم بݨاوݨ دے عزم دا اظہار کیتا۔