پاک چین دوستی لازوال، آزمودہ تے آئرن برادرز دے منفرد رشتے تے قائم اے جیڑھی نسل در نسل منتقل تھئی، ݙونھیں ملکاں دا منفرد تعلق روایتی سفارتی روابط توں ودھ تے اے،عطاء اللہ تارڑ

اسلام آباد۔ 9 جون (اے پی پی) وفاقی وزیرِ اطلاعات تے نشریات عطاء اللہ تارڑ پاکستان تے چین وچال ݙو پاسے تعاون دے ودھارے تے چین پاکستان اقتصادی راہداری (سی پیک) کوں ٻیا اڳو ودھاوݨ دے حکومتی عزم دا اعادہ کریندیں ہوئیں آکھیے جو پاک چین دوستی لازوال، آزمودہ تے ”آئرن برادرز“ دے منفرد رشتے تے قائم اے جیڑھی نسل در نسل منتقل تھئی۔ وزیراعظم شہباز شریف دے اڄوکے دورۂ چین دے بعد پاک چین دوستی نویاں بلندیاں تئیں پُج ڳئی اے، پاکستان تے چین ہک منفرد تعلق رکھدن جیڑھا روایتی سفارتی روابط توں کہیں اڳو اے۔ او منگل کوں اتھاں مقامی ہوٹل اچ ”شنہوا نیوز ایجنسی“ ولوں سی پیک دی تعمیر، 75 سالہ پاک چین دوستی تے گلوبل گورننس انیشی ایٹو توں متعلق منعقدہ تقریب توں خطاب کریندے پئے ہن۔ ایں موقع تے وفاقی وزیرِ منصوبہ بندی، ترقی تے خصوصی اقدامات پروفیسر احسن اقبال، پاکستان اچ چین دے سفیر جیانگ ژائی ڈونگ تے ٻئے وی موجود ہن۔ وفاقی وزیرِ اطلاعات آکھیے جو اے نہ صرف حکومت بلکہ پوری پاکستانی قوم کیتے باعثِ فخر اے جو اساں ہک ایجھے لازوال رشتے دے 75 برس مکمل ہووݨ دا جشن منیندے پئیوں جیڑھا بطورِ قوم اساݙے کیتے انتہائی اہمیت دا حامل اتے اساݙے دلاں دے ٻہوں نیڑے اے۔ انھاں آکھیے جو اساکوں ہک ایجھے مضبوط تے اٹوٹ تعلق جوڑ رکھیے جیڑھا وقت دے نال ٻیا مستحکم تھئے۔ انھاں آکھیے جو اساکوں اے منفرد اعزاز حاصل اے جو پاکستان تے چین دے درمیان ”آئرن برادرز“ دا رشتہ ہک غیر معمولی تے منفرد حیثیت رکھیندے۔ وفاقی وزیر ݙونھیں ملکاں دی قیادت تے عوام کوں خراجِ تحسین پیش کریندیں ہوئیں آکھیے جو اساں حال اچ چین دا دورہ کیتے جتھاں پاک چین دوستی دے عزم دی تجدید کیتی ڳئی تے ایں وژن کوں عملی حقیقت اچ بدلݨ کیتے نویں تحریک تے حوصلہ حاصل تھیا۔ انھاں آکھیے جو وزیراعظم شہباز شریف دے حالیہ دورۂ چین نے پاک چین دوستی کوں نویاں بلندیاں تئیں پڄائے۔ میں ہمیشہ آپݨے چینی دوستاں کوں آکھینداں جو اے دوستی اساکوں نسل در نسل منتقل تھئی اے اتے اے ایجھی میراث اے جیڑھی اساکوں آپݨے وݙیریاں توں ملی اے، جیڑھیاں کہانیاں اساں سݨدے ہئیں اتے جیڑھی ترقی اساں رل تے حاصل کیتی اے او غیر معمولی نوعیت دی اے۔ عطاء اللہ تارڑ آکھیے جو پاکستان تے چین نہ صرف ہک سانجھی سرحد رکھدن بلکہ پہاڑاں، دریاواں سمیت ہک مضبوط رشتے اچ وی شریک ہن جیڑھا ہمیشہ کیتے قابلِ فخر تے قابلِ قدر اے۔ وفاقی وزیر صدر شی جن پنگ دی بصیرت افروز قیادت اچ عالمی گورننس اقدام کوں سراہیندیں ہوئیں آکھیے جو ایں اقدام تھوڑے عرصے اچ مثبت نتائج ݙیوݨ شروع کر ݙتن جئیں دا مقصد گلوبل ساؤتھ دے عوام دی زندگیاں اچ بہتری گھن آوݨ تے انھاں دی نمائندگی کوں فروغ ݙیوݨ اے۔ انھاں آکھیے جو چین پاکستان اقتصادی راہداری (سی پیک) ݙوٹھیں ملکاں دی عوام کوں مزید نیڑے گھن آوݨ اچ کلیدی کردار ادا کیتے جڈانجو صدر شی جن پنگ دا اسلام آباد دا دورہ ہک تاریخی سنگِ میل ہا جئیں پاکستان تے چین دے عوام کیتے ترقی تے خوشحالی دے نویں پندھ دا آغاز کیتا۔ انھاں آکھیے جو بطورِ وفاقی وزیرِ اطلاعات تے نشریات میݙا یقین اے جو ثقافتی تبادلے، عوامی روابط تے میڈیا تعاون ایں شراکت داری تے تعلقات کوں مزید مستحکم بݨاوݨ اچ اہم کردار ادا کر سڳدن۔ وفاقی وزیرِ اطلاعات پاکستان دی حکومت، وزیراعظم تے وزارتِ اطلاعات ولوں سی پیک کوں اڳو ودھاوݨ دے عزم دا اظہار کیتا۔ انھاں آکھیے جو عالمی گورننس اقدام دے فروغ اچ فعال کردار ادا کریندے رہسن۔ وفاقی وزیر آپݨے خطاب دا اختتام ”پاک چین دوستی زندہ باد“ دے الفاظ نال کیتا۔