وفاقی وزیرِ قومی صحت سید مصطفیٰ کمال ہیلتھ سروسز اکیڈمی اچ سکول آف فارماسیوٹیکل سائنسز دا افتتاح کر ݙتا

اسلام آباد۔ 9 جون (اے پی پی) وفاقی وزیر برائے قومی صحت سید مصطفیٰ کمال ہیلتھ سروسز اکیڈمی (ایچ ایس اے) اسلام آباد اچ سکول آف فارماسیوٹیکل سائنسز دا افتتاح کر ݙتے۔ اے اقدام پاکستان اچ فارماسیوٹیکل تعلیم، عوامی صحت دی تحقیق تے شعبہ صحت دے افرادی وسائل دی ترقی دے فروغ دی طرف ہک اہم سنگِ میل ثابت تھیسی۔ تقریب توں خطاب کریندیں ہوئیں وفاقی وزیرِ قومی صحت سید مصطفیٰ کمال آکھیے جو پاکستان دے کول باصلاحیت افراد، مضبوط ادارہ جاتی استعداد تے پیشہ ورانہ صلاحیت موجود اے جئیں دی بدولت ملک آپݨے نظامِ صحت کوں اندرونی وسائل دے ذریعے ٻیا مضبوط تے پائیدار بݨا سڳدے۔ انھاں ایں ڳالھ تے زور ݙتا جو ایجھے قابل ڈاکٹرز، فارماسسٹس تے پبلک ہیلتھ ماہرین تیار کیتے ونڄن جیڑھے دیانت داری، پیشہ ورانہ مہارت تے عوامی خدمت دے جذبے دے نال معاشرے دی خدمت کر سڳن۔ وفاقی وزیر آکھیے جو قومی سطح تے صحت دے شعبے دی ترجیحات کوں علاج توں ہٹا تے بیماریاں دی روک تھام آلے پاسے منتقل کرݨ دی ضرورت اے۔ انھاں آکھیے جو اساݙا مقصد لوکاں کوں صحت مند رکھݨا تے انھاں کوں مریض بݨݨ توں بچاوݨ ہووݨا چاہیدے۔ انھاں آکھیے جو صرف ہسپتالاں دی تعداد ودھاوݨ نال پاکستان کوں درپیش صحت دے مسائل حل نہ تھیسن جݙان تئیں بیماریاں دی روک تھام، بنیادی صحت دیاں سہولتاں، صحت دے فروغ تے نظامِ صحت دی بنیادی ساخت کوں مضبوط بݨاوݨ تے ہکو جہی توجہ نہ ݙتی ونڄے۔ ہیلتھ سروسز اکیڈمی دے وائس چانسلر ڈاکٹر شہزاد علی خان آکھیے جو فارماسیوٹیکل سائنسز صحت دے نظام دا ہک بنیادی ستون ہن تے نواں سکول فارمیسی، عوامی صحت، ریگولیشن تے ہیلتھ سسٹمز ڈویلپمنٹ دے شعبیاں اچ اکیڈمی دی تدریسی، تحقیقی تے پالیسی سازی دی خدمات کوں ٻیا مضبوط بݨیسی۔