پاکستان گلوبل فنڈ دے نال آپݨی شراکت داری کوں ٻہوں قدر دی نگاہ نال ݙیکھدے، وزیراعظم محمد شہباز شریف دی گلوبل فنڈ دے وفد نال ملاقات اچ ڳالھ مہاڑ

اسلام آباد۔ 9 جون (اے پی پی) وزیراعظم محمد شہباز شریف ترقی پذیر دنیا اچ صحتِ عامہ کوں بہتر بݨاوݨ اچ گلوبل فنڈ دے نمایاں کردار تے تعاون کوں سراہیندیں ہوئیں آکھیے جو پاکستان گلوبل فنڈ دے نال آپݨی شراکت داری کوں ٻہوں قدر دی نگاہ نال ݙیکھدے۔ او گلوبل فنڈ دے وفد نال ڳالھ مہاڑ کریندے پئے ہن جئیں منگل کوں اتھاں انھاں نال ملاقات کیتی۔ وفد دی قیادت گلوبل فنڈ دے گرانٹ مینجمنٹ ڈویژن دے مارک ایڈینگٹن کریندے پئے ہن جڈانجو ٻئے ارکان اچ سینئر پورٹفولیو مینجر ازیسکن گویریا تے ڈپٹی جنرل قونصلر نتاشا ہیفنک شامل ہن۔ وزیراعظم آفس دے میڈیا ونگ توں جاری تھیوݨ آلے بیان دے مطابق وزیراعظم وفد کوں پاکستان آوݨ تے خوش آمدید آکھیے۔ انھاں آکھیے جو پاکستان گلوبل فنڈ دے نال آپݨی شراکت داری کوں ٻہوں قدر دی نگاہ نال ݙیکھدے، ترقی پذیر دنیا اچ صحتِ عامہ کوں بہتر بݨاوݨ اچ گلوبل فنڈ دے نمایاں کردار تے تعاون کوں سراہیندے ہئیں ۔ وزیراعظم آکھیے جو پاکستان اچ ہیلتھ کیئر دے نظام دی بہتری اچ گلوبل فنڈ پاکستان دا انتہائی اہم شراکت دار اے، حکومت ملک توں ٹی بی، ایچ آئی وی تے ملیریا دے پھیلاؤ دے خاتمے کیتے پرعزم اے اتے ایں حوالے نال بھرپور کوششاں کریندی پئی اے۔ وزیراعظم وفد توں مخاطب تھی تے آکھیے جو تہاݙی شراکت داری نال پاکستان توں ایچ آئی وی، تپِ دق تے ملیریا دے خاتمے کیتے اساݙیاں کوششاں کوں طاقت ملدی پئی اے۔ وزیراعظم ایچ آئی وی وائرس دی روک تھام دے حوالے توں حکومتِ پاکستان تے گلوبل فنڈ دا جوائنٹ ورکنگ گروپ بݨاوݨ دی ہدایت کیتی۔ وزارتِ قومی صحت دے حکام وفد کوں پاکستان اچ ٹی بی، ایچ آئی وی تے ملیریا دی روک تھام دے حوالے نال حکومتی کوششاں توں آگاہ کیتا۔ وفد پاکستان اچ میزبانی تے حکومتِ پاکستان دا شکریہ ادا کیتا۔ وفد تپِ دق، ایچ آئی وی تے ملیریا دے خاتمے کیتے حکومتِ پاکستان دے اقدامات کوں سراہیا تے انھاں بیماریاں دے خاتمے کیتے پاکستان کیتے آپݨی شراکت داری دا اعادہ کیتا۔ ملاقات اچ وفاقی وزیرِ برائے منصوبہ بندی احسن اقبال، وفاقی وزیرِ قومی صحت سید مصطفیٰ کمال، وفاقی وزیرِ اطلاعات تے نشریات عطاء اللہ تارڑ، وزیرِ اعظم دی فوکل پرسن برائے انسدادِ پولیو عائشہ رضا فاروق تے متعلقہ اعلیٰ سرکاری افسران وی موجود ہن۔