نائب وزیراعظم محمد اسحاق ڈار دا صومالیہ دے وزیرِ خارجہ عبدالسلام علی نال ٹیلیفونک رابطہ، ایم ٹی آنر 25 تے سوار پاکستانی یرغمالیاں دی رہائی کیتے جاری کوششاں تے ڳالھ مہاڑ

اسلام آباد۔ 9 جون (اے پی پی) نائب وزیراعظم تے وزیرِ خارجہ سینیٹر محمد اسحاق ڈار صومالیہ دے وزیرِ خارجہ عبدالسلام علی نال ٹیلیفونک رابطہ کیتے جئیں اچ ایم ٹی آنر 25 تے سوار پاکستانی یرغمالیاں دی رہائی کیتے جاری کوششاں تے ڳالھ مہاڑ کیتی ڳئی۔ پاکستان اپریل 2026ء اچ صومالیہ دے ساحل دے قریب جہاز دے اغواء دے بعد توں صومالی حکام دے نال مسلسل رابطے اچ اے۔ منگل دے ݙینھ دفترِ خارجہ توں جاری تھیوݨ آلے بیان دے مطابق نائب وزیراعظم تے وزیرِ خارجہ صورتحال تے پاکستان دی گہری تشویش دا اظہار کریندیں ہوئیں یرغمالیاں دی خیریت، انھاں دی جلد توں جلد رہائی تے محفوظ وطن واپسی دی اہمیت تے زور ݙتا۔ صومالی وزیرِ خارجہ عبدالسلام علی یقین دہانی کرائی جو انھاں دی حکومت یرغمالیاں دی جلدی توں جلدی رہائی کیتے مخلصانہ تے مسلسل کوششاں جاری رکھیسی۔ ݙونھیں رہنماواں ایں معاملے دے حل تئیں قریبی رابطہ تے آپسی تعاون برقرار رکھݨ تے اتفاق کیتا۔ ݙونھیں وزرائے خارجہ پاکستان تے صومالیہ دے درمیان ݙو پاسے تعلقات اچ مثبت پیشرفت تے اطمینان دا اظہار وی کیتا۔ صومالی وزیرِ خارجہ خطے اچ پاکستان دی تعمیری ثالثی تے سفارتی کوششاں کوں سراہیا۔