عاشوردا ݙینھ اساکوں صبر، استقامت، ایثار، حق گوئی تے اصولاں تے ثابت قدم رہݨ دا درس ݙیندے، صدر آصف علی زرداری

اسلام آباد۔26جون(اے پی پی) صدرِ مملکت آصف علی زرداری آکھیے جو یومِ عاشور اسلامی تاریخ دا ہک عظیم تے بامعنی ݙینھ اے جیڑھا اساکوں صبر، استقامت، ایثار، حق گوئی تے اصولاں تے ثابت قدم رہݨ دا درس ݙیندے، اے ݙینھ کئی اہم تاریخی واقعے دی یاد تازہ کریندے پر تاریخِ اسلام اچ ایں دی ساریں توں نمایاں نسبت نواسہِ رسولؐ حضرت امام حسین رضی اللہ تعالیٰ عنہ، اہل بیتِ اطہار تے انھاں دے رفقائے وفا دی ایں عظیم قربانی نال اے جیڑھی 61 ہجری اچ میدانِ کربلا اچ پیش آئی۔ ایوانِ صدر دے پریس ونگ توں یومِ عاشورہ دے موقع تے جاری اپݨے پیغام اچ صدرِ مملکت آصف علی زرداری آکھیا جو واقعہِ کربلا محض ہک تاریخی سانحہ کائنی بلکہ ہک دائمی پیغام تے ہک زندہ درسگاہ اے، حضرت امام حسین رضی اللہ تعالیٰ عنہ اپݨے عمل نال امتِ مسلمہ کوں اے تعلیم ݙتی جو حق، عدل، دیانت تے انسانی وقار دے تحفظ کیتے ہر قسم دی قربانی ݙتی ونڄ سڳدی اے پر باطل، ظلم تے ناانصافی دے سامݨے سرتسلیم خم نئی کیتا ونڄ سڳدا۔صدرِ مملکت آکھیا جو انھاں دی جدوجہد دا مقصد امت دی اصلاح تے دینِ محمدی ﷺ دی حقیقی اقدار دا تحفظ ہئی، اڄ اساکوں بطورِ قوم اے عہد کرݨا چاہیدے جو اساں حضرت امام حسین رضی اللہ تعالیٰ عنہ دی سیرت توں حق پسندی، اخلاقی جرأت، صبر و تحمل، ایثار تے خدمتِ خلق دے اوصاف کوں اپݨی انفرادی تے اجتماعی زندگی دا حصہ بݨیسوں۔صدرِمملکت آصف علی زرداری آکھیا جو او سارے پاکستانیاں توں اپیل کریندن جو عاشورہ دے ݙینھاں اچ امن، رواداری، بین المسالک احترام تے بھرپی دی فضا کوں ودھارا ݙیون، افواہیں تے اشتعال انگیز رویں توں اجتناب کرن تے قومی وحدت و یکجہتی دے استحکام کیتے اپݨا مثبت کردار ادا کرن۔ انھاں دعا کیتی جو اللہ تعالیٰ اساکوں واقعہِ کربلا دے حقیقی پیغام کوں سمجھݨ، ایں توں رہنمائی حاصل کرݨ تے اپݨی زندگیاں کوں حق، عدل، صبر تے تقویٰ دے اصولاں موجب سوارݨ دی توفیق عطا فرماوے