واقعہِ کربلا اصلاحِ امت، احیائے سنتِ نبوی ﷺ تے امر بالمعروف و نہی عن المنکر دے عظیم مقصد کیتے قربانی دا ناں اے، وزیرِاعظم شہباز شریف

اسلام آباد۔26جون(اے پی پی) وزیرِاعظم محمد شہباز شریف آکھیے جو واقعہِ کربلا اصلاحِ امت، احیائے سنتِ نبوی ﷺ تے امر بالمعروف و نہی عن المنکر دے عظیم مقصد کیتے قربانی دا ناں اے، اے مقصد اساݙے توں تقاضا کریندے جو اپݨی انفرادی تے اجتماعی زندگیاں اچ عدل و انصاف، صبر و برداشت تے ذمہ واری دے اوصاف کوں ودھارا ݙیون، اختلافات، نفرت تے انتشار دے بجائے سانجھے احترام، رواداری تے یکجہتی جیہاں اقدار دی مضبوطی اساݙے سامݨے ہووݨی چاہیدی اے۔وزیرِاعظم دفتر دے میڈیا ونگ توں یومِ عاشور 10 محرم الحرام 1448ھ تے جاری پیغام اچ وزیراعظم آکھیا جو یومِ عاشور بلا شبہ اسلامی تاریخ دا ہک فکرانگیز ݙینھ اے جیڑھا نوعِ انسانی کوں ایمان، صبر و استقامت، ایثار، حق پسندی تے اصلاحِ معاشرہ دے بے مثال سبقاں نال روشناس کرویندے۔ انھاں آکھیا جو اے ݙینھ اللہ تعالیٰ دی نصرت، اہلِ ایمان دی کامیابی تے حق دی سربلندی کیتے قربانیاں دے عظیم واقعیں دی یاد ݙویندے۔ نواسہِ رسول ﷺ حضرت امام حسین رضی اللہ تعالیٰ عنہ تے انھاں دے جانثار رفقاء دی عظیم قربانی یومِ عاشور کوں تاریخِ اسلام اچ منفرد تے دائمی اہمیت دا حامل بݨا ݙتے۔واقعہِ کربلا اساکوں اے پیغام ݙیندے جو اصولاں تے اقدار دی پاسداری ہک باوقار تے مہذب معاشرے دی بنیاد اے۔ حضرت امام حسین رضی اللہ تعالیٰ عنہ اپݨے طرزِ عمل نال ثابت کیتا جو حق و صداقت، عدل و انصاف تے انسانی عظمت دے تحفظ کیتے قربانی ݙیوݨ درحقیقت ظلم و جبر، ناانصافی تے باطل دے سامݨے سر تسلیم خم کرݨ توں افضل اے۔ انھاں آکھیا جو واقعہِ کربلا اصلاحِ امت، احیائے سنتِ نبوی ﷺ تے امر بالمعروف و نہی عن المنکر دے عظیم مقصد کیتے کاوش دا ناں اے۔ اے مقصد اساݙے توں تقاضا کریندے جو اساں اپݨی انفرادی تے اجتماعی زندگیاں اچ عدل و انصاف، صبر و برداشت تے ذمہ واری دے اوصاف کوں ودھارا ݙیون۔ اختلافات، نفرت تے انتشار دے بجائے سانجھےاحترام، رواداری تے یکجہتی جیہاں اقدار دی مضبوطی اساݙے سامݨے ہووݨی چاہیدی اے۔وزیرِاعظم آکھیا جو پوری قوم بالخصوص علماء کرام، مشائخ عظام، ذاکرین، میڈیا تے نوجوان نسل توں اپیل اے جو او یومِ عاشور دے حقیقی پیغام کوں اجاگر کرن، بین المسالک احترام و ہم آہنگی کوں ودھارا ݙیون، اشتعال انگیزی تے نفرت دا سدِ باب کرن۔ انھاں آکھیا جو آؤ اڄ اے عہد کروں جو حضرت امام حسین رضی اللہ تعالیٰ عنہ تے شہدائے کربلا دی عظیم قربانی دی رہنمائی اچ حق و انصاف دے نال اپݨی جُڑت کوں تکڑا کریسوں۔ معاشرے دے کمزور تے محروم طبقیں دے حقوق دے تحفظ کوں یقینی بݨیسوں تے اپݨے کردار و عمل نال ہک مضبوط، متحد تے پرامن قوم دی تعمیراچ اپݨا بھرپور کردار ادا کریسوں، اللہ تعالیٰ دنیا بھر اچ امن و استحکام تے پوری امتِ مسلمہ کوں اتحاد، اتفاق تے خیر و برکت نال نوازے