وفاقی وزیرقیصر احمد شیخ دی یومِ عاشور دے مرکزی تعزیہ جلوس وچ شرکت

چنیوٹ۔ 26 جون (اے پی پی) سرمایہ کاری بورڈ دے وفاقی وزیر قیصر احمد شیخ چنیوٹ وچ یومِ عاشور دے مرکزی تعزیہ جلوس وچ اپݨے دیرے دے ٻاہر شرکت کیتی۔ بعد وچ میڈیا نال ڳالھ مہاڑ کریندیں انھاں آکھیا چنیوٹ ہمیشہ مذہبی ہم آہنگی، بھرپی تے سانجھے احترام دی روشن مثال رہیے، جتھاں سارے مکاتبِ فکر دے لوک محبت، عقیدت تے اتحاد دے نال یومِ عاشور منیندن۔انھاں یومِ عاشور دے مثالی انتظامات تے وزیراعلیٰ پنجاب مریم نواز شریف دیاں کوشِشاں دی تعریف کریندے آکھیا انھاں دی ہدایات تے ضلعی انتظامیہ، پولیس تے ٻنہاں اداریں بہترین انتظامات کیتن، جئیں پاروں جلوس تے مجالس پرامن ماحول وچ تھئن۔ وفاقی وزیر آکھیا چنیوٹ وچ فرقہ واریت دی کوئی گنجائش کائنی بلکہ اتھاں محبت، رواداری تے سانجھے احترام دی فضا قائم اے۔ حضرت امام حسینؓ دی عظیم قربانی پوری امتِ مسلمہ کیتے صبر، استقامت، حق تے انصاف دا لازوال درس اے، جیندے تے عمل کرتے ہی معاشرے وچ امن تے فلاح کوں ودھایا ونڄ سڳدے۔انھاں مرکزی تعزیہ جلوس دے منتظمین، انجمن، رضاکاراں تے عزاداراں دا شکریہ ادا کریندیں آکھیا سبھے مثالی تعاون کیتا۔ قیصراحمد شیخ مزید آکھیا حکومت عوامی خدمت تے ترقیاتی منصوبیں دا سفر جاری رکھیسی تے موجودہ قومی اڳواݨی دی رہنمائی وچ پاکستان ٻیا ترقی کریسی۔ ایندے توں پہلے وفاقی وزیر قیصر احمد شیخ جھنگ روڈ تے پنگو موڑ تے حضرت امام حسینؓ کانفرنس وچ وی شرکت کیتی۔