این ڈی ایم اے دا ملک دے مختلف علاقیں اچ ممکنہ چھل دا الرٹ جاری

اسلام آباد۔ 15 ستمبر(اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر (این ای او سی) ملک دے مختلف علاقیں اچ ممکنہ چھل دا الرٹ جاری کر ݙتے، 17 ستمبر 2026 تئیں گلگت بلتستان، خیبر پختونخوا، پنجاب تے بلوچستان دے کجھ علاقیں اچ مینھ وسݨ پاروں چھل دا خطرہ اے ۔ این ڈی ایم اے توں جاری بیان موجب اُتلے علاقیں اچ متوقع مینھ پاروں دریاواں تے ندی نالیں دے وہݨ اچ ودھارے دا ݙر اے، گلگت بلتستان اچ گلگت، دیامر، غذر، اشکومن، گپس یاسین، نگر، ہنزہ، شمشال، اسکردو تے شگر دے علاقیں اچ اچانک چھل دی صورتحال پیدا تھی سڳدی اے۔ خیبر پختونخوا اچ اپر دیر، سوات، باجوڑ، ملاکنڈ، کرم، کوہستان، مہمند تے اورکزئی دے علاقیں اچ وی چھل دا خطرہ اے، بلوچستان اچ ژوب، شیرانی تے موسیٰ خیل دے علاقیں اچ چھل دی صورتحال متوقع اے۔ اسلام آباد تے پنجاب دے مختلف علاقیں بشمول راولپنڈی، گوجرانوالہ، سرگودھا، جھنگ، ٹوبہ ٹیک سنگھ تے شیخوپورہ دے شہری علاقیں اچ وی چھل دی صورتحال متوقع اے۔ این ڈی ایم اے ممکنہ خطرے پاروں سارے متعلقہ اداریں کوں پیشگی الرٹ جاری کر ݙتے تے متعلقہ اداریں کوں ممکنہ چھل دی صورتحال نال نبڑݨ کیتے پیشگی تیاری دی ہدایت کیتی اے۔