کالعدم ’’جیک‘‘ کوں افغانستان توں اسلحہ سپلائی کرݨ آلا بین الاقوامی نیٹ ورک وپکڑ ڳھدا ڳئے، وزیرمملکت داخلہ دی پریس کانفرنس

اسلام آباد۔ 16 ستمبر (اے پی پی) وزیر مملکت داخلہ سینیٹر طلال چوہدری انکشاف کیتے جو سکیورٹی فورسز انٹیلی جنس بیسڈ آپریشن دے دوران آزاد کشمیر دی کالعدم تنظیم ’’جیک‘‘ دی قیادت کوں سرحد پار توں غیر قانونی اسلحہ ݙیوݨ آلا منظم نیٹ ورک پکڑ ڳھدے جیندے اچ ترسیل کیتے ھک سرکاری ملازم اپݨے سرکاری کور کوں بطور سہولت کار استعمال کریندا پیا ہئی۔ اتھاں پریس کانفرنس نال خطاب کریندے وزیر مملکت داخلہ نیٹ ورک دے فرانزک شواہد، آڈیو ریکارڈنگز تے تفتیشی تفصیلات میڈیا دے سامݨے رکھیاں۔ انہاں ݙسایا جو اے کارروائی ملک اچ دہشت گردی دے خلاف جاری روزانہ تقریباً 200 انٹیلی جنس بیسڈ آپریشنز دا حصہ اے، جیندے ذریعے افغانستان، باڑہ، خیبر پختونخوا تے آزاد کشمیر وچال قائم ٹیرر کرائم نیکسس کوں توڑیا ڳئے۔ سینیٹر طلال چوہدری نیٹ ورک دے طریقہ کار دی تفصیل ݙسیندے آکھیا جو آپریشن دا آغاز کشمیر موڑ تے فورسز تے فائرنگ دے بعد ضیا نامی ملزم دی گرفتاری نال تھئے، جیڑھا گزریل ݙو سالاں توں کالعدم جیک دے سرکردہ رکن سردار امان دے کارِ خاص ماجد کوں اسلحہ ݙیندا پیا ہئی۔ انہاں ݙسایا جو اسلحہ افغانستان دے صوبے ننگرہار توں زرشاد نامی ڈیلر دے ذریعے باڑہ پڄایا ویندا ہئی، جتھوں اکبر نامی ھک سرکاری ملازم اپݨے سرکاری عہدے تے استثنا کوں ڈھال بݨا تے ایں کوں مختلف چیک پوسٹاں توں سوکھیں گزار تے آزاد کشمیر منتقل کریندا ہئی۔ وزیر مملکت واضح کیتا جو ملزمان دے وچال 22 لکھ روپے دی ڈیل تھئی جیندے اچوں 11 لکھ روپے ہنڈی دے ذریعے ادا کیتے ڳئے جݙاں جو سرکاری ملازم بطور کیریئر فی پھیرا ھک توں ݙو لکھ روپے وصول کریندا ہئی۔ انہاں آکھیا جو جیک دے 38 اچوں 37 مطالبات تسلیم کیتے ونڄݨ دے باوجود کشمیر اچ انتخابات دے دوران پرتشدد کارروائیاں کروائیاں ڳیاں تاں جو ٻاہرلے اشارے تے ریاست دے خلاف سازش کیتی ونڄ سڳے۔ انہاں آکھیا جو سمگلنگ، منشیات، نان کسٹم پیڈ گاݙیاں تے غیر قانونی پیٹرول پمپاں دے پچھوں موجود سیاسی تے سرکاری سہولت کاراں دے ڳٹھ جوڑ کوں بھنیے بغیر دہشت گردی دا مکمل خاتمہ ممکن کائںی۔ وزیر مملکت ٹیرر کرائم نیکسس اچ ملوث عناصر کوں کڑی سزاوں ݙیواوݨ کیتے سخت دہشت گردی مخالف قوانین تے سپیڈی ٹرائل کورٹس دے قیام دی لوڑھ تے زور ݙتا۔