وزیراعظم شہباز شریف دی بوسنیا و ہرزیگووینا دی صدارتی کونسل دے چیئرمین نال ملاقات

نیویارک۔23 ستمبر (اے پی پی) وزیراعظم محمد شہباز شریف بوسنیا و ہرزیگووینا دے نال پاکستان دے تاریخی، نیڑے بھرپی دے تعلقات دی اہمیت دا اعادہ کریندے انہاں تعلقات کوں تجارت تے اقتصادی تعاون تے مبنی مضبوط تے وسیع البنیاد شراکت داری اچ تبدیل کرݨ دی خواہش ظاہر کیتی اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف بوسنیا و ہرزیگووینا دی صدارتی کونسل دے چیئرمین ڈاکٹر ڈینس بیچیرووچ نال ملاقات کیتی۔ اقوام متحدہ دی جنرل اسمبلی دے اجلاس دے موقع تے تھیوݨ آلی ملاقات دے دوران ݙوہیں رہنماواں پاکستان تے بوسنیا و ہرزیگووینا وچال ݙوطرفہ تعلقات دے سارے پہلواں دا جائزہ ڳھدا، جنہاں اچ سیاسی، اقتصادی، دفاعی تعاون، ہنرمند افرادی قوت دا تبادلہ، تعلیم تے ثقافت دے شعبے شامل ہن۔ ݙوہیں رہنماواں سانجھی دلچسپی دے علاقائی تے عالمی امور تے وی ڳالھ کیتی ۔ وزیراعظم بوسنیا و ہرزیگووینا دے نال پاکستان دے تاریخی، نیڑے بھرپی دے تعلقات دی اہمیت دا اعادہ کریندے انہاں تعلقات کوں تجارت تے اقتصادی تعاون تے مبنی مضبوط تے وسیع البنیاد شراکت داری اچ تبدیل کرݨ دی خواہش دا اظہار کیتا۔ وزیراعظم بوسنیا و ہرزیگووینا دی خودمختاری تے علاقائی سالمیت کیتے پاکستان دی بھرپور حمایت دا اعادہ کریندے زور ݙتا جو علاقائی استحکام ھک مضبوط، مستحکم تے خوشحال بوسنیا و ہرزیگووینا نال وابستہ اے۔ بوسنیا و ہرزیگووینا دے یورپی یونین اچ شمولیت دے مذاکرات دے باضابطہ آغاز تے ڈاکٹر ڈینس بیچیرووچ کوں مبارخ ݙیندے وزیراعظم آکھیا جو پاکستان بوسنیا و ہرزیگووینا کوں یورپی تے مغربی بلقان دیاں منڈیاں تئیں پاکستانی مصنوعات دی رسائی کیتے خطے اچ تجارت تے علاقائی رابطے دے ممکنہ مرکز دے طور تے ݙیہدے۔ ڈاکٹر ڈینس بیچیرووچ مغربی ایشیا تے خلیجی خطے اچ کشیدگی اچ کمی تے حالات کوں معمول تے گھن آوݨ کیتے پاکستان دے ثالثی کردار دی تعریف کیتی ۔ ڈاکٹر ڈینس بیچیرووچ سندھ طاس معاہدے کوں معطل رکھݨ دے اقدام دی غیر قانونی حیثیت متعلق پاکستان دے مؤقف دی وی مکمل حمایت کیتی۔ ݙوہیں رہنماواں پاکستان تے بوسنیا و ہرزیگووینا وچال ݙوطرفہ تعلقات کوں مزید ودھاوݨ کیتے سانجھے رابطے اچ رہݨ تے رل تے کم کرݨ تے اتفاق کیتا۔ ایں ضمن اچ آندے ݙینھاں ݙوہیں ملکاں وچال اعلیٰ سطحی دوریں دے تبادلے کوں وی ودھارا ݙتا ویسے۔